Tripti Dimri | ‘యానిమల్’ చిత్రంతో బాలీవుడ్ నాయిక త్రిప్తి దిమ్రి జాతకం ఒక్కసారిగా మారిపోయింది. ఆ సినిమా తర్వాత ఈ భామ డేట్స్ కోసం బాలీవుడ్ అగ్ర దర్శకనిర్మాతలు పోటీ పడ్డారు. ప్రస్తుతం త్రిప్తి చేతిలో అరడజనుకుపైగా భారీ చిత్రాలున్నాయి. తాజాగా ఈ భామ బాలీవుడ్లో మరో బంపరాఫర్ను చేజిక్కించుకుంది.
ధనుష్ నటిస్తున్న ‘తేరే ఇష్క్ మే’ చిత్రంలో కథానాయికగా త్రిప్తి పేరును ఖరారు చేశారు. ఆనంద్ ఎల్ రాయ్ దర్శకత్వంలో ఈ చిత్రం తెరకెక్కనుంది. ధనుష్-ఆనంద్ ఎల్ రాయ్ కాంబినేషన్లో వచ్చిన ‘రాన్జనా’ విషాద ప్రేమకథగా ప్రేక్షకుల్ని మెప్పించింది. దాదాపు పదేళ్ల విరామం తర్వాత వీరిద్దరు కలిసి పనిచేస్తుండటంతో ‘తేరే ఇష్క్ మే’ చిత్రంపై ఇప్పటికే అంచనాలు ఏర్పడ్డాయి.
‘రాన్జనా’ తరహాలోనే వారణాసి నేపథ్య కథాంశంతో ‘తేరే ఇష్క్ మే’ చిత్రం తెరకెక్కనుందని చెబుతున్నారు. ఈ సినిమాలో ధనుష్ ప్రేమికురాలిగా త్రిప్తి దిమ్రి కనిపించనుంది. అక్టోబర్లో ఈ చిత్రం సెట్స్మీదకు వెళ్లనుంది. త్రిప్తి ద్రిమి నటించిన తాజా చిత్రం ‘బ్యాడ్న్యూస్’ ఈ నెల 19న ప్రేక్షకుల ముందుకురానుంది.