చెన్నైలోని పోయోస్ గార్డెన్ సంపన్నులు నివసించే ప్రాంతంగా పేరు పొందింది. సినీ, రాజకీయ ప్రముఖుల్లో చాలా మందికి ఆ ప్రాంతంలో విలాసవంతమైన భవంతులున్నాయి. తమిళ అగ్ర హీరో ధనుష్ కొన్ని నెలల క్రితం 150కోట్ల భారీ వ్యయంతో అధునాతన సౌకర్యాలతో అక్కడ ఓ ఇల్లు కట్టుకున్నారు.
ఇంటి నిర్మాణానికి అంత డబ్బు ఖర్చు పెట్టడంతో చెన్నై సినీ వర్గాల్లో ఈ హౌస్ హాట్టాపిక్గా మారింది. తాజాగా ఈ విషయం గురించి ధనుష్ తన తాజా చిత్రం ‘రాయన్’ ఆడియో వేడుకలో స్పందించారు. ‘నేను చిన్నప్పట్నుంచి రజనీకాంత్సార్ వీరాభిమానిని.
నా పదహారేళ్ల వయసులో పోయోస్ గార్డెన్లోని ఆయన ఇంటిని చూసి ఆశ్చర్యపోయాను. అద్భుతమనిపించింది. ఎప్పటికైనా ఆ స్థాయిలో ఇల్లు కట్టుకోవాలనే బలమైన కోరిక కలిగింది. జీవితంలో బాగా సక్సెస్ అయితే అదే తరహాలో ఇల్లు కట్టుకోవాలనుకున్నా. ఆ కలను ఇలా నిజం చేసుకున్నా. నా అభిరుచులను ప్రతిబింబించేలా ఇల్లు డిజైన్ చేసుకున్నా.’ అని ధనుష్ చెప్పుకొచ్చారు.