సంక్రాంతి పర్వదినం సందర్భంగా విడుదలైన ‘హను-మాన్’ చిత్రానికి చక్కటి ఆదరణ లభిస్తున్నది. తేజ సజ్జా కథానాయకుడిగా ప్రశాంత్వర్మ దర్శకత్వంలో తెరకెక్కిన ఈ చిత్రం పాన్ ఇండియా స్థాయిలో దూసుకుపోతున్నది. ఇప్పటికే 200కోట్ల వసూళ్ల క్లబ్లో చేరింది. ఈ సినిమాకు సీక్వెల్గా ‘జై హనుమాన్’ రాబోతున్న విషయం తెలిసిందే. ఈ సినిమా స్క్రిప్ట్ వర్క్ మొత్తం పూర్తయిందని, భారీ హంగులతో తెరకెక్కించబోతున్నామని దర్శకుడు ప్రశాంత్వర్మ ఇటీవలే ప్రకటించారు. హనుమాన్ పాత్రలో ఓ అగ్ర హీరో నటిస్తారని ఆయన చెప్పారు.
దాంతో ఈ విషయంపై సోషల్మీడియాలో జోరుగా చర్చలు జరుగుతున్నాయి. హనుమాన్ పాత్రలో రామ్చరణ్ నటించబోతున్నారనే వార్త ట్రెండింగ్లో ఉంది. రామ్చరణ్ స్వతహాగా ఆంజనేయుడి భక్తుడు కావడంతో ఈ వార్తలకు మరింత ప్రాధాన్యత ఏర్పడింది. అయితే ఈ ప్రచారంలో నిజమెంతో తెలియాలంటే చిత్ర బృందం నుంచి అధికారిక ప్రకటన వచ్చే వరకు వేచి చూడాల్సిందేనని అభిమానులు అంటున్నారు. ఇదిలా వుండగా శంకర్ దర్శకత్వంలో రామ్చరణ్ నటిస్తున్న తాజా చిత్రం ‘గేమ్ ఛేంజర్’ సెప్టెంబర్లో ప్రేక్షకుల ముందుకురానుంది.