SSMB 29 | సినిమా విడుదల కోసం అభిమానులు, ప్రేక్షకులు ఎదురుచూడటం పరిపాటే. కానీ.. షూటింగ్ ఎప్పుడు మొదలవుతుందా?.. ఆని అసక్తిగా ఎదురుచూడటం మాత్రం ఒక్క రాజమౌళి సినిమాల విషయంలోనే జరిగేది. ఆయన సినిమా అధికారిక ప్రకటన నుంచే సినిమా ప్రమోషన్స్ కూడా మొదలవుతాయి. అది రాజమౌళి ైస్టెల్. మహేశ్, రాజమౌళి సినిమా ప్రకటన కోసం ప్రపంచవ్యాప్తంగా ఉన్న కోట్లాదిమంది ఎదురుచూస్తున్నారు.
రాజమౌళి, రచయిత విజయేంద్రప్రసాద్ కొన్ని ప్రైవేటు కార్యక్రమాల్లో ఈ సినిమా గురించి ఇస్తున్న చిన్న చిన్న లీకులే, పెద్ద పెద్ద వార్తలై కూర్చుంటున్నాయి. మహేశ్ తన హెయిర్ స్టయిల్ మార్చుకోవడం, స్పెషల్ ట్రైనర్ని పెట్టుకొని కసరత్తులు షురూ చేయడం.. వీటిని కూడా వార్తలు కింద వండేస్తున్నారు. లోకం చుట్టిన వీరుడి కథతో ఈ సినిమా తీయబోతున్నట్టు ఇప్పటికే వార్తలు వినిపిస్తున్నాయి. తాజాగా ఈ సినిమా సంగీత దర్శకుడు ఎం.ఎం.కీరవాణి ఓ జాతీయ మీడియాకి ఇచ్చిన అప్డేట్.. ఈ సినిమా విషయంలో కాస్త క్లారిటీని ఇచ్చింది.
‘నేనిప్పటివరకూ రాజమౌళి సినిమాకు సంబంధించిన సంగీత పనులు మొదలుపెట్టలేదు. ఎందుకంటే ఈ వారమే ఈ కథ లాక్ అయింది. ప్రస్తుతం టెస్ట్ షూట్స్ జరుగుతున్నాయి. జూలైలోకానీ, ఆగస్టులో కానీ మ్యూజిక్ వర్క్ స్టార్ట్ చేస్తా.’ అన్నారు. అంటే.. ఇప్పటివరకూ కథే లాక్ అవ్వలేదు. ఇంకా స్క్రీన్ప్లే, డైలాగ్స్.. చాలా తతంగముంది. రాజమౌళి ప్రీప్రొడక్షన్ వర్క్కే ఎక్కువ సమయం తీసుకుంటారు. దీన్ని బట్టి ఈ సినిమా షూటింగ్ ఈ ఏడాది మొదలవ్వడం కష్టమనే చెప్పాలి.