ఇప్పటికే పలువురు ప్రముఖులు డీప్ ఫేక్ వీడియోల కారణంగా ఇబ్బందులు ఎదుర్కొనగా తాజాగా ఆ జాబితాలో బాలీవుడ్ నటుడు సోనూసూద్ చేరారు. కష్టకాలంలో ఎంతో మందికి ఆయన అండగా నిలిచి రియల్ హీరో అనిపించుకున్నారు. కొందరు ఆకతాయిలు ఇప్పుడు అతని ఫేక్ వీడియోను రూపొందించి అభిమానులను డబ్బులు అడుగుతున్నారు. దీనిపై జాగ్రత్తగా ఉండాలని సోనూసూద్ తన సోషల్ మీడియా ద్వారా సూచించారు.
‘కొందరు నా డీప్ ఫేక్ వీడియోను క్రియేట్ చేసి అభిమానులతో చాటింగ్ చేస్తూ, వారికి వీడియో కాల్స్ చేస్తూ డబ్బులు వసూలు చేయాలని చూస్తున్నారు. చాలా మంది అమాయకులు ఆ వీడియోలో ఉన్నది నేనే అనుకొని సైబర్ నేరగాళ్ల వలలో పడుతున్నారు. ఇలాంటి వీడియో కాల్స్ వస్తే నమ్మకండి. జాగ్రత్తగా ఉండండి’ అని ఆయన కోరారు. నిజ జీవితంలో జరిగిన ఇలాంటి ఘటనల మీదే తాను ‘ఫతే’ సినిమా తీస్తున్నట్లు చెప్పారు. డీప్ ఫేక్, లోన్ యాప్స్ వల్ల జరుగుతున్న సైబర్ నేరాలను అందులో చూపించనున్నట్లు తెలిపారు.
మొదట రష్మిక డీప్ ఫేక్ వీడియో వైరల్గా మారిన సంగతి తెలిసిందే. ఆ తర్వాత అలియా భట్, కాజోల్, కత్రినా కైఫ్, ప్రియాంక చోప్రా డీప్ ఫేక్ వీడియోలు ఆందోళన కలిగించాయి. తాజాగా క్రికెట్ దిగ్గజం సచిన్ కూడా దీని బారిన పడ్డారు. వీటిపై ఇప్పటికే పలువురు ప్రముఖులు ఆగ్రహం వ్యక్తం చేశారు. ఇలాంటి ఘటనలకు పాల్పడుతున్న వారిపై కఠిన చర్యలు తీసుకోవాలని కోరారు. వీటిని నివారించేందుకు త్వరితగతిన చర్యలు తీసుకోవాలని డిమాండ్ చేశారు.