‘ఒక వ్యక్తి తప్పు చేసినా ఒప్పు చేసినా అతని ఆలోచనలే కారణం. మనం చేసే పనిముందు ఆలోచనల సంఘర్షణ జరుగుతుంది. వాటిని విజువలైజ్ చేసి ఈ సినిమాలో చూపిస్తున్నాం. ఇదొక వినూత్న ప్రయత్నం’ అని దర్శక,నిర్మాత వెంకటసత్య అన్నారు. ఆయన స్వీయ దర్శకత్వంలో నిర్మించిన చిత్రం ఆపరేషన్ రావణ్’. రక్షిత్ అట్లూరి, సంకీర్తన విపిన్ జంటగా నటించిన ఈ చిత్రంలో రాధిక శరత్కుమార్ కీలకపాత్రధారి. ధ్యాన్ అట్లూరి నిర్మాణంలో రూపొందిన ఈ న్యూఏజ్ సస్పెన్స్ థ్రిల్లర్ ఈ నెల 26న విడుదల కానుంది. ఈ సందర్భంగా సోమవారం దర్శక,నిర్మాత వెంకటసత్య విలేకరులతో ముచ్చటించారు. ‘నేటి తరం యువత ఎప్పుడు ఎలా రియాక్టవుతారో చెప్పలేని పరిస్థితి. ఒక మనిషి సైకోగా ఎందుకు మారతాడు? అనేది ఇందులో చూపించాం. రామాయణం ఇన్స్పిరేషన్గా రూపొందిన థ్రిల్లర్ ఇది. ’ అని చెప్పారు వెంకటసత్య. హీరో రక్షిత్ తన కుమారుడు అవ్వడంచేత, పోరాట సన్నివేశాలు తీసే టైమ్లో కాస్త టెన్షన్ ఫీలయ్యానని ఆయన అన్నారు. రక్షిత్ చాలా బాగా నటించాడని, కష్టమైన సమాసాలతో కూడిన పద్యాన్ని కూడా సింగిల్ టేక్లో ఓకే చేశాడని, అలాగే శరవణ వాసుదేవన్ సంగీతం సినిమాకు హైలైట్ అని వెంకటసత్య పేర్కొన్నారు.