కెరీర్ పరంగా ఎక్కువ గ్యాపే తీసుకుంది సమంత. ఆరోగ్యం, మానసిక ఉల్లాసం కోసం ఈ విలువైన సమయాన్నంతా కేటాయించింది. ఎట్టకేలకు మళ్లీ కెమెరా ముందుకు రాబోతున్నది. అది కూడా తన సొంత నిర్మాణ సంస్థ ద్వారా. ఇటీవలే ‘మా బంగారుతల్లి’ అనే సినిమా పేరు కూడా తన ఇన్స్టా ద్వారా ప్రకటించింది సమంత. ఈ సినిమాకు సంబంధించిన ప్రీ ప్రొడక్షన్ పనులు కూడా జరుగుతున్నట్టు సమాచారం. ఇదిలావుంటే.. అసలు ఈ సినిమాకు దర్శకుడెవరు? అనేది సమంత అభిమానుల్లో నెలకొన్న ప్రశ్న. ఓ యువ దర్శకుడు ఈ సినిమాకు దర్శకత్వం వహించనున్నాడట. ఈ కథ కూడా అతనిదే అని సమాచారం. త్వరలోనే ఆ దర్శకుడి పేరును సామ్ ప్రకటించనుంది. ఇందులోని తన పాత్ర గురించి ఆమె చెబుతూ ‘నటిగా నన్ను మరోస్థాయిలో నిలబెట్టే సినిమా ఇది. ఇందులో కొత్త సమంతను చూస్తారు. ఇందులో నేనే హీరో. నటిగా నాకొక సవాల్ ఈ సినిమా. మిగతా వివరాలు త్వరలోనే ప్రకటిస్తా’ అని సామ్ ఇటీవల ఇచ్చిన ఓ ఇంటర్వ్యూలో పేర్కొన్నది.