కన్నడ సోయగం రష్మిక మందన్న ప్రస్తుతం వరుస సినిమాలతో బిజీగా ఉంది. తెలుగుతో పాటు హిందీలో కూడా పలు భారీ ప్రాజెక్ట్స్ ఈ భామ చేతిలో ఉన్నాయి. అయితే డేట్స్ సమస్యల కారణంగా ఆమె ఓ చిత్రం నుంచి తప్పుకోనుందని వార్తలు వినిపించాయి. తాజాగా వీటిపై స్పష్టతనిచ్చింది రష్మిక మందన్న. నితిన్ కథానాయకుడిగా వెంకీ కుడుముల దర్శకత్వంలో ఓ చిత్రం తెరకెక్కుతున్న విషయం తెలిసిందే.
ఇందులో రష్మిక మందన్న కథానాయికగా నటిస్తున్నది. అయితే బాలీవుడ్ ఆఫర్లను దృష్టిలో పెట్టుకొని ఆమె ఈ సినిమా నుంచి తప్పుకుందని సోషల్మీడియాలో రూమర్స్ వచ్చాయి. వీటిపై రష్మిక మందన్న మాట్లాడుతూ ‘ఈ వార్తల్లో ఎలాంటి నిజం లేదు. దీని గురించి అధికారికంగా మీకు ఎవరైనా సమాచారం ఇచ్చారా? అలాంటిదేమీ లేదు కాబట్టి ఆ వార్తలు ఖచ్చితంగా అబద్ధం అని నేను చెప్పగలను’ అని పేర్కొంది. ప్రస్తుతం ఈ భామ తెలుగులో ‘పుష్ప-2’ ‘రెయిన్బో’ చిత్రాల్లో నటిస్తున్నది.