Rashmika Mandanna | దేశవ్యాప్తంగా ఉన్న బిజీయ్యస్ట్ హీరోయిన్లలో రష్మిక మందన్న ఒకరు. భాషలకు అతీతంగా సినిమాలు చేస్తూ పాన్ ఇండియా హీరోయిన్ అయిపోయారామె. సందీప్రెడ్డి వంగా దర్శకత్వంలో రణబీర్ కపూర్తో కలిసి ఆమె చేస్తున్న ‘యానిమల్’ సినిమా డిసెంబర్లో విడుదల కానుంది. అలాగే తెలుగు, తమిళ భాషల్లో రూపొందుతున్న ‘రెయిన్బో’ సినిమాలో కూడా ఆమె నటిస్తున్నారు. ఇక ‘పుష్ప-2’ ఎలాగూ ఉంది.
ఇప్పుడు ఇదంతా దేనికంటే.. ఇంత బిజీగా ఉండికూడా మరో సినిమాకు గ్రీన్సిగ్నల్ ఇచ్చేశారట రష్మిక. అది కూడా సాదాసీదా సినిమాకాదు. రవితేజ, మలినేని గోపీచంద్ల సినిమా. డాన్శీను, బలుపు, క్రాక్ సినిమాలతో ఇప్పటికే హ్యాట్రిక్ హిట్లను ఖాతాలో వేసుకున్న కాంబినేషన్ ఇది. మరి వీరిద్దరి నాలుగో సినిమా అంటే అంచనాలు ఏ స్థాయిలో ఉంటాయో అర్థం చేసుకోవచ్చు.
ఇప్పుడు వీరిద్దరికి తోడు రష్మిక కూడా జత కలిసిందంటున్నారు. రవితేజ, రష్మిక కలిసి నటించడం ఇదే ప్రథమం. ఇద్దరి ఎనర్జీ లెవల్స్ పీక్స్లో ఉంటాయి. ఇక ఎంటర్టైన్మెంట్కి కొదువుండదు. ‘క్రాక్’ మాదిరిగానే వాస్తవ సంఘనల ఆధారంగా ఈ కథను తయారు చేశారట మలినేని. క్రాక్, వీరసింహారెడ్డి చిత్రాలకు మాటలు రాసిన సాయిమాధవ్ బుర్రానే ఈ సినిమాకి కూడా సంభాషణలు అందిస్తున్నారని విశ్వసనీయ సమాచారం. ప్రస్తుతం స్క్రిప్ట్ వర్క్ దశలో ఉన్న ఈ సినిమా రెగ్యులర్ షూటింగ్ అక్టోబర్ 20 నుంచి మొదలుకానున్నట్టు తెలిసింది.