Ram Charan | ‘ప్రతిష్టాత్మకమైన ది ఇండియన్ ఫిల్మ్ ఫెస్టివల్ ఆఫ్ మెల్బోర్న్(IFFM)లో భాగం కావడం నటుడిగా నాకు దక్కిన పెద్ద గౌరవం. ఈ వేదికపై భారతీయ సినిమా తరఫున ప్రాతినిధ్యం వహిస్తున్నందుకు గర్వంగా ఉంది. ప్రపంచవ్యాప్తంగా ఉన్న అభిమానులతో, సినీ ప్రముఖులతో కనెక్ట్ కావడం మరింత ఉత్సాహాన్నిస్తోంది’ అంటూ రామ్చరణ్ ఆనందం వ్యక్తం చేశారు.
ఆస్ట్రేలియా మెల్బోర్న్లో అత్యంత ప్రతిష్టాత్మకమైన ది ఇండియన్ ఫిల్మ్ ఫెస్టివల్ ఆఫ్ మెల్బోర్న్(IFFM) వేడుకలు ఈ ఏడాది ఆగస్ట్ 15 నుంచి 25 వరకూ ఘనంగా జరుగనున్నాయి. ఇది ఆస్ట్రేలియాలోని విక్టోరియన్ రాష్ట్ర ప్రభుత్వం ప్రతి ఏటా నిర్వహించే అధికారిక చలన చిత్రోత్సవం. ఈ వేడుకకు చెందిన IFFM 15 ఎడిషన్కు గౌరవ అతిథిగా రామ్చరణ్ హాజరు కానున్నారు.
అంతేకాక, ‘గెస్ట్ ఆఫ్ హానర్’ అవార్డును కూడా అందుకోనున్నారు. ఈ సందర్భంగా రామ్చరణ్ ఇంకా మాట్లాడుతూ ‘ఆర్ఆర్ఆర్ సినిమా ప్రపంచవ్యాప్తంగా ఎంతటి విజయాన్ని దక్కించుకుందో తెలిసిందే. మెల్బోర్న్లో ఆ సినిమాకు సంబంధించిన అనుభవాలను ప్రేక్షకులతో పంచుకోబోతుండటం ఊహించుకుంటేనే చెప్పలేని ఆనందాన్నిస్తోంది.
అలాగే మెల్బోర్న్లో మన జాతీయ జెండాను ఎగురవేసే అద్భుతమైన క్షణాలకోసం ఎదురుచూస్తున్నాను’ అని రామ్చరణ్ అన్నారు. ‘ఆర్ఆర్ఆర్’ సినిమా ద్వారా ప్రపంచవ్యాప్తంగా గుర్తింపు సాధించిన రామ్చరణ్ IFFM వేడుకల్లో పాల్గొనబోతుండటం తనకెంతో గర్వకారమని IFFM డైరెక్టర్ మితు బౌమిక్లాండ్ అన్నారు.