తెలుగు ఫిల్మ్ ఛాంబర్ ఆఫ్ కామర్స్ (టీఎఫ్సీసీ) నూతన అధ్యక్షుడిగా ప్రముఖ నిర్మాత దిల్ రాజు ఎన్నికయ్యారు. ఆదివారం హైదరాబాద్లో జరిగిన ఎన్నికల్లో దిల్రాజు, సి.కల్యాణ్ ప్యానెల్లు పోటీ పడ్డాయి. దిల్రాజు ప్యానెల్ కీలక పోస్ట్లను కైవసం చేసుకుంది. ప్రొడ్యూసర్ సెక్టార్, డిస్ట్రిబ్యూషన్ సెక్టార్, స్టూడియో సెక్టార్, ఎగ్జిక్యూటివ్ సెక్టార్ల నుంచి మొత్తం 1,339 మంది సభ్యులు ఓటు హక్కును వినియోగించుకున్నారు.
ఈ ఎన్నికల్లో 2023-25 సంవత్సరానికి గాను నూతన కార్యవర్గాన్ని సభ్యులు ఓటింగ్ ద్వారా ఎన్నుకున్నారు. టీఎఫ్సీసీ ఉపాధ్యక్షుడిగా ముత్యాల రామదాసు, కార్యదర్శిగా దామోదరప్రసాద్, కోశాధికారిగా ప్రసన్నకుమార్ ఎన్నికయ్యారు. భారీ మెజార్టీతో తనను గెలిపించిన సభ్యులకు దిల్రాజు కృతజ్ఞతలు తెలిపారు.