Cinema News | బ్లాక్బాస్టర్ ‘హను-మాన్’ని అందించిన ప్రైమ్షో ఎంటర్టైన్మెంట్ సంస్థ నుంచి రానున్న రొమాంటిక్ కామెడీ ఎంటర్టైనర్ ‘డార్లింగ్’. ప్రియదర్శి, నభానటేశ్ జంటగా నటిస్తున్న ఈ చిత్రానికి అశ్విన్రామ్ దర్శకుడు. జూలై 19న సినిమా విడుదల కానుంది. ఇప్పటికే విడుదలైన ప్రచారచిత్రాలకు మంచి స్పందన వస్తున్నది.
నేటి జనరేషన్కి కనెక్టయ్యే కంటెంట్తో అన్ని వర్గాల ప్రేక్షకులనూ అలరించేలా ఈ చిత్రాన్ని దర్శకుడు తెరకెక్కిస్తున్నారని, తమ సంస్థలో మరో బ్లాక్బాస్టర్గా ఈ సినిమా నిలుస్తుందని నిర్మాతలు నమ్మకం వెలిబుచ్చారు. బ్రహ్మానందం, విష్ణు, కృష్ణతేజ్, అనన్య నాగళ్ల కీలక పాత్రలు పోషిస్తున్న ఈ సినిమాకి కెమెరా: నరేశ్ రామదురై, మాటలు: హేమంత్, సంగీతం: వివేక్ సాగర్.
కొత్త దర్శకుడితో రానా నెక్ట్స్ మూవీ?
‘రానా నాయుడు’ వెబ్ సిరీస్ తర్వాత విరామం తీసుకున్నారు హీరో రానా. ఆయన తదుపరి సినిమా ఏంటి? అనే విషయంపై ఫిల్మ్వర్గాల్లో ప్రస్తుతం చర్చోపచర్చలు జరుగుతున్నాయి. తేజ దర్శకత్వంలో ‘రాక్షసరాజు’ సినిమా చేస్తున్నట్టు అప్పట్లో వార్తలొచ్చాయి. కానీ అది పట్టాలెక్కలేదు. అలాగే గుణశేఖర్ దర్శకత్వంలో ‘హిరణ్యకశ్యప’ అనే పౌరాణిక చిత్రం కూడా అనుకున్నారు.
అది కూడా ప్రస్తుతం హోల్డ్లోనే ఉంది. మరి ఈ రెండిట్లో ముందు మోక్షం దేనికో! అని అందరూ ఎదురు చూస్తుంటే.. అందరి ఆలోచనలను తల్లకిందులు చేస్తూ.. ఓ కొత్త దర్శకుడి కథను రానా ఓకే చేశారట.. త్వరలోనే ఈ సినిమా షూటింగ్ కూడా మొదలు కానున్నదట. ఆర్కా మీడియా వర్క్స్ నిర్మించనున్న ఈ సినిమాకు కథానాయికగా ‘కేజీఎఫ్’ఫేం శ్రీనిధిని ఎంపిక చేసినట్టు సమాచారం. అధికారిక ప్రకటన త్వరలోనే రానుంది.