Jr. NTR | హీరోలను నెగెటివ్ షేడ్స్లో చూపించడంలో ప్రశాంత్నీల్ది ప్రత్యేకశైలి. ‘కేజీఎఫ్’ ఫ్రాంచైజీనే అందుకు ఉదాహరణ. ‘సలార్ శౌర్యాంగపర్వం’ తర్వాత ఆయన ఎన్టీఆర్తో సినిమా చేయనున్న విషయం తెలిసిందే. ఈ సినిమాకు ‘డ్రాగన్’ అనే టైటిల్ పరిశీలనలో ఉంది. డ్రాగన్ అంటే యూరోపియన్ సంస్కృతిలో చెడుకి గుర్తు. మైథాలజీలో ‘డ్రాగన్’ అంటే రాక్షసుడు.
చూపులకు పాములా, కాళజెర్రిలా కనిపించే డ్రాగన్కి నిప్పును పీల్చే గణం ఉంటుంది. అలాగే డ్రాగన్ అంటే అలజడికి సింబాలిక్. మరి ఇలాంటి భయంకరమైన టైటిల్ని ఈ సినిమాకు అనుకోవడం ప్రస్తుతం చర్చకు దారితీసింది. ఇదిలావుంటే.. తాజా సమాచారం ప్రకారం ఇందులో తారక్ది నెగెటివ్ రోల్ అని తెలుస్తున్నది. టైటిల్కి తగ్గట్టుగా ఉండేలా తారక్ కేరక్టర్ని ప్రశాంత్ డిజైన్ చేశారట.
హీరోను నెగెటివ్గా చూపించడంలో ప్రశాంత్ మాస్టర్ అయితే.. నెగెటివ్ పాత్రల్లో నటించడంలో తారక్ ప్రిన్సిపల్. ‘టెంపర్’లో పోలీస్ఆఫీసర్ దయాగా ఆయన నటన గురించి ఇప్పటికీ చెప్పుకుంటారు. ఇక ‘జై లవకుశ’లో ‘జై’ పాత్ర గురించి అందరికీ తెలిసిందే. ఓ విధంగా నటుడిగా తారక్ విశ్వరూపం అది. ప్రస్తుతం హృతిక్రోషన్తో చేస్తున్న ‘వార్’ సినిమాలో కూడా తారక్ నెగెటివ్ రోల్లోనే కనిపిస్తారని బాలీవుడ్ టాక్. ప్రశాంత్నీల్ కూడా ఆయన్ని నెగెటివ్గా చూపించబోతున్నాడని తెలుస్తున్నది. ఇది అభిమానులను నిజంగా ఆనందింపజేసే వార్తే.