కథానాయిక మెహరీన్ ఇటీవల ‘ఎగ్ఫ్రీజింగ్’ (గర్భధారణ కోసం అండాలను భద్రపరిచే విధానం) గురించి వివరిస్తూ సోషల్ మీడియాలో ఓ పోస్ట్ పెట్టింది. అయితే ఈ వీడియోపై కొన్ని వెబ్సైట్లలో తప్పుడు వార్తలు రాశారని, వారు వెంటనే క్షమాపణలు చెప్పాలని మెహరీన్ డిమాండ్ చేసింది. ఆమె మాట్లాడుతూ ‘నేను పోస్ట్ చేసిన వీడియోను పూర్తిగా అర్థం చేసుకొని వార్తలు రాయాలి. ఇలా తప్పుడు సమాచారాన్ని ప్రజలకు చేరవేయడం క్షమించరాని నేరం. నేను ధైర్యం చేసి ఎగ్ఫ్రీజింగ్ అనే విధానం గురించి మాట్లాడాను. ఫ్రీజింగ్ ఎగ్స్ కోసం అమ్మాయిలు గర్భవతులు కావాల్సిన అవసరం లేదు. పిల్లలు అప్పుడే వద్దనుకునే వారికి ఈ విధానం బాగా ఉపయోగపడుతుంది. ఇలాంటి ప్రాథమిక అంశాల మీద అవగాహన లేకుండా ఇష్టానుసారంగా వార్తలు రాశారు. నేను గర్భవతినయ్యానని కూడా ప్రచారం చేశారు. ఇకనైనా తప్పుడు వార్తలను తొలగించి వెంటనే క్షమాపణలు చెప్పండి. లేకపోతే నేను చట్టపరంగా పోరాడుతా’ అని హెచ్చరించింది. ప్రస్తుతం ఆమె కామెంట్స్ సోషల్మీడియాలో హాట్టాపిక్గా మారాయి.