1994లో ఇండస్ట్రీలో అడుగుపెట్టి.. తనదైన నటనతో ఎన్నో నేషనల్ అవార్డులు, ఫిల్మ్ఫేర్ అవార్డులను గెలుచుకున్నారు మనోజ్ బాజ్పాయ్. హిందీతోపాటు తెలుగు, తమిళ భాషల్లో సినిమాలు చేసిన మనోజ్.. ఇటీవల మీడియాతో మాట్లాడుతూ తన జీవితంలో జరిగిన అత్యంత విషాద సంఘటనను పంచుకున్నారు.
“ఆ రోజు నేను ‘కిల్లర్ సూప్’ వెబ్సిరీస్ సెట్స్లో ఉన్నాను. నా సోదరి ఫోన్ చేసి నాన్న జీవితం పూర్తయినట్టేనని చెప్పింది. డాక్టర్లు మాత్రం నాన్న ఇంకా ఈ ప్రపంచంలో ఉన్నారని చెప్పారు. నాన్నకూ, నాకు మధ్య మంచి అనుబంధం ఉండేది. అందుకే నాన్నకు ఫోన్ చేసి ‘నాన్నా.. నొప్పి భరించింది చాలు.. అందరినీ వదిలేసి వెళ్లిపోయే సమయం వచ్చేసింది.. ప్లీజ్ వెళ్లిపో..’ అని చెప్పా. నేనలా మాట్లాడిన తర్వాతి రోజు తెల్లవారుజామునే నాన్న మరణించారు. నాన్నతో నేను ఆ మాటలు చెప్పినప్పుడు వ్యాన్లో బాయ్ ఉన్నాడు. నా మాటలు విన్న బాయ్ విపరీతంగా ఏడ్చేశాడు. ఆ రోజులు చాలా కష్టంగా గడిచాయి. నా గొంతు విన్న తర్వాత మనసు తేలికపడటంతో నాన్న ఆనందంగా తుదిశ్వాస విడిచారు. ఆయన మరణించారనే వార్త విన్న తర్వాత నాకు కన్నీళ్లు ఆగలేదు. అదే నా జీవితంలో అత్యంత విషాద సంఘటన” అని చెప్పుకొచ్చారు మనోజ్ బాజ్పాయ్.