నటీనటులు : బాసిల్ జోసెఫ్, దర్శన రాజేందర్
సంగీతం : అంకిత్ మీనన్
ఎడిటర్ : జాన్ కుట్టి
రచన-దర్శకత్వం : విపిన్ దాస్.
ఈ మధ్య కాలంలో భాషతో సంబంధంలేకుండా కథ, కథనం కొత్తగా ఉంటే చాలు ప్రేక్షకులు అన్ని భాషల సినిమాలను ఆదరిస్తున్నారు. ఇటీవల కాలంలో ఎన్నో పరభాష సినిమాలు తెలుగులో రిలీజై ఘన విజయాలు సాధించాయి. అందులో కొన్ని థియేటర్లో విడుదలై భారీ విజయాలు సాధించగా.. మరికొన్పి ఓటీటీలో విడుదలై ప్రేక్షకాదరణ పొందాయి. ఈ మధ్య కన్నడ నుండి వచ్చిన కాంతార, తమిళం నుండి వచ్చిన లవ్ టుడే సినిమాలు కలెక్షన్లతో అదరగొట్టాయి. వాటి బడ్జెట్లతో పోలిస్తే.. ఎన్నోరెట్ల వసూళ్ళతో బాక్సాఫీస్ దుమ్మ దులిపాయి. ఈ కోవలోకే రీసెంట్ గా మలయాళంలో రిలీజైన జయ జయ జయ జయహే వస్తుంది. కేవలం 5 కోట్లతో నిర్మితమైన ఈ సినిమా బాక్సాఫీస్ దగ్గర ఏకంగా రూ.40 కోట్ల గ్రాస్ కలెక్షన్లు సాధించి మలయాళంలో సంచలనం సృష్టించింది. బసిల్ జోసెఫ్, దర్శన రాజేంద్రన్ ప్రధాన పాత్రలో నటించిన ఈ కామెడీ డ్రామా తాజాగా హాట్ స్టార్ లో రిలీజైంది. మలయాళంతో పాటు తెలుగు, కన్నడ, తమిళ భాషల్లోనూ ఈ చిత్రం అందుబాటులో ఉంది. అంతగా ఈ సినిమా హిట్టవ్వడానికి అసలు ఈ సినిమాలో ఏముంది అసలు సినిమా స్టోరీ ఏంటి అనేది రివ్యూలో తెలుసుకుందాం.
కథేంటంటే:
జయ అలియాస్ దర్శన తెలివైన మధ్య తరగతి అమ్మాయి. డిగ్రీ వరకు చదువుకోవాలని ఆరాటపడుతూ ఉంటుంది. దాని కోసం ఒక మంచి కాలేజీను ఎంచుకుంటుంది. కానీ ఆమె తల్లిదండ్రులు అప్పటికే కొడుకును ఖరీదైన కాలేజీలో చేర్పిస్తారు. ఇక జయ వంతు వచ్చే సరికి స్థోమత లేక ఊరికి దగ్గరలో ఉన్న చిన్న కాలేజీలో చేర్పిస్తారు. ఏమి చేయలేక జయ చిన్న కాలేజీలోనే చదువుకుంటుంది. అదే సయమంలో ఫెమనిసం భావాలున్న లెక్చరర్తో ప్రేమలో పడుతుంది. ఆ విషయం తెలుసుకున్న జయ తల్లిదండ్రులు ఆమె చదువు పూర్తికాక ముందే జయకు వివాహం చేయాలని నిర్ణయించుకుంటారు. రాజేశ్ అనే పౌల్ట్రీ ఫారమ్ యజమానితో జయకు పెళ్ళి నిశ్చయిస్తారు. జయ మాత్రం తనని పెళ్ళి చేసుకోవాలంటే చదువును కంటిన్యూ చేస్తానని షరతు పెడుతుంది. అందుకు రాజేశ్ కూడా ఒప్పుకుంటాడు. కానీ, పెళ్లయిన తర్వాత అతనిలో పురుషాహంకారం మేల్కొంటుంది. జయ చదువును వాయిదా వేస్తూ ఇంట్లో జరిగే ప్రతీది తన ఇష్ట ప్రకారమే జరగాలని మొండిగా ఉంటాడు.
ఆ తర్వాత జయపై చీటికి మాటికి అరూస్తూ.. శారీరకంగా హింసిస్తాడు. ఇదే విషయాన్ని జయ తల్లిదండ్రులకు చప్తుంది. కానీ వాళ్ళు పెళ్ళి తర్వాత ఇందంతా సాధారణమే, సర్ధుకుపోతుండాలి అని చెబుతారు. దాంతో తన కష్టాలను ఎవరూ తీర్చరన్న నిజాన్ని గ్రహించి తనను తాను కాపాడుకోవడం కోసం.. యూట్యూబ్ లో కరాటే నేర్చుకుంటుంది. ఎప్పటిలాగానే ఒక రోజు జయ భర్త.. ఆమెను కొట్టడానికి ముందుకొస్తాడు. ఇక అప్పుడు జయ, భర్తపై తిరగబడుతుంది. కరాటే విన్యాసాలతో తన భర్తను చితక బాదుతుంది. ఆ తర్వాత జయ భర్త.. జయతో మాట్లాడాడటానికి కూడా భయపడుతుంటాడు. ఆ సంఘటన వల్ల రాజేష్, జయ నుండి విడాకులు తీసుకోవాలనుకుంటాడు. మరి చివరికి రాజేష్, జయతో విడాకులు తీసుకున్నాడా లేదా జీవితాన్ని అలానే కొనసాగించాడా అనేది తెలియాలంటే సినిమా చూస్తే తెలుస్తుంది.
ఎలా ఉందంటే:
ఈ మధ్య కాలంలో ఇలాంటి నేపథ్యంలో చాలానే సినిమాలు చాలానే సినిమాలు వచ్చాయి. అయితే ఈ సినిమాను కామెడీ పంథాలో తెరకెక్కించి సక్సెస్ అయ్యాడు దర్శకుడు విపిన్ దాస్. కథలోకి వెళ్ళడానికి ఎక్కువ సమయం తీసుకోకుండా, మూవీ స్టార్ అయిన పది నిమిషాలకే ప్రేక్షకులను సినిమా ప్లాట్ లోకి తీసుకెళ్ళాడు. ఒక సగటు మధ్య తరగతి కుటుంబం ఎలా ఉంటుందో చక్కగా చెప్పాడు. గతంలోలాగా భర్త ఏది చెబితే అని వినాలి అనే ధోరణి ఇప్పుడు సాగడం లేదని, ఇప్పుడు భార్యలు కూడా తిరగబడుతున్నారని చెప్పాడు. అంతేకాకుండా భార్య తిరగబడితే సమాజంలో భర్త ఎలాంటి ఇబ్బందులను ఎదుర్కుంటాడాని కళ్ళకు కట్టినట్లుగా చూపించాడు. కాబట్టి భార్యను నొప్పించకుండా, ఆగ్రహానికి గురి కాకుండా చూసుకోవాలని చిన్న మెసేజ్ కూడా ఇచ్చాడు.
ఎవరెలా చేశారంటే:
రాజేష్ గా బాసిల్ జోసేఫ్ చక్కటి ప్రదర్శనను కనబరిచాడు. తన నటనతో ప్రేక్షకులను కడుపుబ్బా నవ్వించాడు. ఇక దర్శన తన నటనతో సినిమాకు ప్రాణం పోసిందని చెప్పాలి. తన విలక్షణ మైన నటనతో ప్రేక్షకులను ఫిదా చేసింది. అంకీత్ మీనన్ సంగీతం ప్రత్యేక ఆదర్శనగా నిలిచింది. తన నేపథ్యం సంగీతంతో సినిమాను మరో లెవల్ కు తీసుకెళ్ళాడు. బజ్లూ అజు సినిమాటోగ్రఫి బాగుంది. ప్రొడక్షన్ వాల్యూస్ బాగున్నాయి. సినిమా మొదలైన దగ్గరి నుండి క్లైమాక్స్ వరకు ఒక్క నిమిషం కూడా బోర్ అనిపించదు.
ప్లస్లు:
స్టోరీ లైన్
నటీనటుల పర్ ఫార్మెన్స్
కామెడీ
క్లైమాక్స్
మైనస్లు:
కొన్ని చోట్ల అతిగా అనిపించడం
ఫైనల్ గా.. కుటుంబమంతా కలిసి చూసే ఒక మంచి సినిమా
రేటింగ్ : 3.25