‘నా కూతురు పెళ్లి చేయాల్సింది నేను. నన్ను చేయనివ్వండి. మీకెందుకు తొందర?’ అంటూ అసహనం వ్యక్తం చేశారు సురేశ్ కుమార్. ఇంతకి ఈ సురేశ్కుమార్ ఎవరనుకుంటున్నారా? మన మహానటి కీర్తి సురేశ్ నాన్నగారు. కొన్ని రోజులుగా కీర్తి సురేశ్ పెళ్లిపై సోషల్ మీడియాలో రూమర్లు చక్కర్లుకొడుతున్నాయి. సంగీత దర్శకుడు అనిరుధ్, కీర్తి ప్రేమలో ఉన్నారని, త్వరలో పెళ్లిపీటలు ఎక్కనున్నారని ఈ రూమర్ల సారాంశం. దక్షిణాదిలోనే అనుకుంటే.. ఈ వార్త బాలీవుడ్ మీడియాలో కూడా బలంగా వినపడుతున్నది. దీంతో సురేశ్ కుమార్ అసహనం వ్యక్తం చేశారు.
‘అసలు ఈ వార్తల్లో నిజంలేదు. ఎవరో పనిగట్టుకొని పుకార్లు సృష్టిస్తున్నారు. ఇంతకుముందు కూడా ఇలాంటి వార్తలు కొన్ని వచ్చాయి. మేం పట్టించుకోలేదు. రానురాను మరీ ఎక్కువ చేస్తున్నారు’ అంటూ మండిపడ్డారు సురేశ్ కుమార్. ఈ విషయంపై కీర్తి సురేశ్ మాట్లాడుతూ ‘అనిరుధ్ నాకు మంచి స్నేహితుడు. ఇంచుమించూ మాది ఒకే ఏజ్. అందుకే క్లోజ్గా ఉంటాం. దానికే ప్రేమంటే ఎలా? నా జీవితంలోకి అడుగుపెట్టే ఆ మిస్టరీ పర్సన్ ఎవరో నాకే తెలీదు. తెలిస్తే తప్పకుండా చెబుతాను’ అన్నారు.