Chiranjeevi | విజయావారి క్లాసిక్ ‘జగదేకవీరునికథ’ సినిమా గుర్తుందా? అందులో రామారావు.. ఇంద్రుడి కూతురైన జయంతిని, నాగేంద్రుడి కూతురైన నాగినినీ, వరుణదేవుడి కూతురైన వారుణిని, అగ్నిదేవుడి కూతురైన మరీచిని పెళ్లాడేసి జగదేకవీరుడు అనిపించేసుకుంటాడు. జయంతి పాత్ర పోషించిన బి.సరోజాదేవి అందులో మెయిన్ హీరోయిన్ అయితే.. మిగిలిన ముగ్గురూ సైడ్ హీరోయిన్లన్నమాట. ప్రస్తుతం మెగాస్టార్ చిరంజీవి కూడా ఇలాంటి కథతోనే ప్రేక్షకులను పలకరించనున్నట్టు విశ్వసనీయ సమాచారం.
ఇందులో కూడా చిరంజీవి.. దేవ, దానవ, పాతాళ, యక్ష, భూ లోకాలన్నీ తిరిగి వస్తాడంట. ఈ లోకాలన్నీ చుట్టొచ్చేది ఎందుకోసమంటే, ఓ పాప కోసం అని తెలుస్తున్నది. ఎలాగూ లోకాలు తిరుగుతున్నాడు కాబట్టి, లోకానికొక కథానాయిక ఉంటే సబబు అనుకున్నాడేమో దర్శకుడు వశిష్ఠ. మొత్తం అయిదు లోకాలకు గాను, అయిదుగురు హీరోయిన్లను ఖరారు చేసేపనిలో ఉన్నాడట. మొన్నటివరకూ అనుష్క, మృణాళ్ ఠాకూర్ పేర్లు మాత్రమే వినిపించాయి. రీసెంట్గా ఐశ్వర్యరాయ్ పేరు కూడా బలంగానే వినిపిస్తున్నది. మరో ఇద్దరు కథానాయికలను ఎంపిక చేయాల్సివుందని సమాచారం. మరి ఈ అయిదుగురిలో అసలు నాయిక ఎవరనేది మిలియన్ డాలర్ల ప్రశ్న. యూవీ క్రియేషన్స్ నిర్మిస్తున్న ఈ చిత్రం షూటింగ్ త్వరలో ప్రారంభం కానుంది. ఈ చిత్రానికి సాయిమాధవ్ బుఱ్ఱా సంభాషణలు అందించనున్న విషయం తెలిసిందే.