ప్రభాస్ కథానాయకుడిగా నటిస్తున్న సైన్స్ ఫిక్షన్ ఫాంటసీ చిత్రం ‘కల్కి 2898 ఏడీ’ కోసం అభిమానులు ఆసక్తిగా ఎదురుచూస్తున్నారు. ఇటీవల విడుదల చేసిన టీజర్ సినిమాపై మరింతగా అంచనాలను పెంచింది. ఈ చిత్రాన్ని వచ్చే ఏడాది సంక్రాంతికి విడుదల చేయబోతున్నామని నిర్మాతలు తొలుత ప్రకటించారు. అయితే హాలీవుడ్ స్థాయి సాంకేతిక హంగులతో తెరకెక్కిస్తున్న చిత్రం కావడంతో గ్రాఫిక్స్ హంగులకు చాలా సమయం పట్టొచ్చని అంటున్నారు.
ఈ నేపథ్యంలో ఈ సినిమా విడుదల వాయిదా పడనుందని వార్తలొస్తున్నాయి. వీటిపై తాజా ఇంటర్వ్యూలో స్పందించారు చిత్ర దర్శకుడు నాగ్అశ్విన్. ‘కల్కి 2898 ఏడీ’ సినిమా షూటింగ్ కొంత భాగమే మిగిలి ఉందని, త్వరలో పూర్తి చేస్తామని చెప్పారు. ‘ఈ సినిమాలో ఓ కొత్త ప్రపంచాన్ని ఆవిష్కరిస్తున్నాం. ప్రభాస్ సరికొత్త అవతారంలో దర్శనమిస్తారు. ప్రస్తుతం మేమంతా సినిమా త్వరగా పూర్తి చేయాలనే తపనతో ఉన్నాం. ఆ తర్వాత విడుదల తేదీ గురించి తెలియజేస్తాం’ అని నాగ్అశ్విన్ పేర్కొన్నారు. వైజయంతీ మూవీస్ పతాకంపై అగ్ర నిర్మాత సి.అశ్వనీదత్ ఈ చిత్రాన్ని నిర్మిస్తున్నారు. అమితాబ్ బచ్చన్, కమల్హాసన్ వంటి దిగ్గజ నటులు ఈ సినిమాలో భాగమయ్యారు.