Alia Bhatt | ఫిలింఫేర్ ఓటీటీ అవార్డుల వేడుకలో తళుక్కున మెరిసింది బాలీవుడ్ బ్యూటీ అలియాభట్. ఈ వేడుకలో ఉత్తమనటిగా అవార్డును అందుకున్నారామె. ఈ సందర్భంగా అభిమానులకు వేదిక సాక్షిగా అభివాదం చేసింది అలియా. తదనంతరం అభిమానులతో ప్రత్యేకంగా ముచ్చటించింది. ‘
నేను బాగా నటిస్తానని ఒకప్పుడు అందరూ మెచ్చుకున్నారు. ఇప్పుడేమో గొప్ప నటిని, మహానటిని అంటున్నారు. ఇలాంటి అభినందనలు, బిరుదులూ, సత్కారాలు, పురస్కారాలు నా బాధ్యతను మరింత పెంచుతున్నాయి. నేను కమర్షియల్ హీరోయిన్ని. ప్రతిసారీ గొప్ప పాత్రలు రావు. ఇప్పుడు డబ్బుకోసం నటించాలంటే భయం వేస్తుంది’ అంటూ చెప్పుకొచ్చింది అలియా. అతి చిన్నవయసులో జాతీయ ఉత్తమనటి అవార్డు అందుకుని రికార్డు సృష్టించడం పట్ల ఆమె మాట్లాడుతూ ‘ఆ అవార్డు అందుకున్న వారందరిలో నేనే చిన్నదాన్నని ఆలస్యంగా తెలిసింది. ఈ విషయం తెలిశాక రణ్బీర్ నాకు చాలా విలువైన బహుమతి ఇచ్చాడు. ఏమిచ్చాడో అడగొద్దు.. అది సీక్రెట్’ అంటూ అందంగా నవ్వేసింది అలియా.