Anjali | ‘కథను బట్టి పాత్రలుంటాయి. పాత్రలు పండితేనే కథ పండుతుంది. కాబట్టే పాత్రధారులు సాహసాలకు సిద్ధపడాలి, త్యాగాలు చేయాలి. అలా చేయలేనివాళ్లు ఆర్టిస్టులుగా పనికిరారు.’ అంటూ నిర్మొహమాటంగా చెప్పేసింది అందాలభామ అంజలి. తాజాగా ‘బహిష్కరణ’ వెబ్సిరీస్తో ప్రేక్షకుల ముందుకొచ్చిన అంజలి.. ఓ ఇంటర్వ్యూలో కథలో పాత్రల ప్రాముఖ్యం గురించి, తన కెరీర్ గురించి, ‘బహిష్కరణ’లో చేసిన ఇంటిమేట్ సీన్స్ గురించి ఆసక్తికరంగా మాట్లాడింది.
‘సినిమా మీద ప్రేమతో ఈ రంగంలోకి వచ్చాను. నటన నాకు చాలా నేర్పింది. పాత్ర ప్రాధాన్యతను బట్టి నేను చేసిన హోమ్ వర్క్ నన్ను మనిషిగా మరోస్థాయిలో నిలబెట్టింది. ఓ పాత్ర కోసం మార్షల్ ఆర్ట్స్ నేర్చుకున్నాను. ఓ పాత్ర కోసం డ్యాన్స్ నేర్చుకున్నాను. రీసెర్చ్ చేస్తూ ఉంటే జ్ఞానం ఆటోమేటిగ్గా పెరుగుతుందికదా. అందులో భయంకరమైన కష్టాలను అనుభవించిన సందర్భాలూ ఉన్నాయి. ‘నవరస’ అనే సిరీస్ చేసినప్పుడు కాస్ట్యూమ్స్ కారణంగా కొన్ని గంటలపాటు వాష్రూమ్కు కూడా వెళ్లలేదు.
ఆ నరకం వర్ణనాతీతం.’ అని తెలిపింది అంజలి. ‘బహిష్కరణ’లో ఇంటిమేట్ సీన్స్ గురించి మాట్లాడుతూ ‘నా లైఫ్లో అలాంటి సీన్స్ చేయడం ఇదే ప్రథమం. చేసేటప్పుడు కొంచెం గందరగోళానికి గురయ్యాను. నా పరిస్థితిని గమనించి, లొకేషన్లో ఉన్న వాళ్లందర్నీ బయటకు పంపి ఆ సీన్స్ తీశారు. పాత్రకోసం చేశాను. అది నటిగా నాధర్మం. అలాగే ‘గ్యాంగ్స్ ఆఫ్ గోదావరి’లోని నా పాత్ర కోసం కూడా చాలా కష్టపడ్డా. పాత్రకైతే న్యాయం చేయగలంకానీ.. ఫలితం మన చేతిలో ఉండదు కదా.’ అంటూ చెప్పకొచ్చింది అంజలి.