Anirudh Ravichander | ఇప్పటికిప్పుడు సౌత్లో టాప్ మ్యూజిక్ డైరెక్టర్ ఎవరయ్యా అంటే మ్యూజిక్ లవర్స్ ఠక్కున చెప్పే పేరు అనిరుధ్ రవిచందర్. కోలీవుడ్లోనే కాదు ఇతని డిమాండ్ పక్క వుడ్లలోనూ మాములుగా లేదు. ఓ వైపు పాటలతో పిచ్చెక్కిస్తూనే.. మరోవైపు నేపథ్య సంగీతంతో గూస్బంప్స్కు అసలు సిసలైన నిర్వచనం తెలుపుతున్నాడు. మరీ ముఖ్యంగా ఈ మధ్య కాలంలో అనిరుధ్ నేపథ్య సంగీతం గురించి మాట్లాడని సినీ ప్రేక్షకుడు లేడు. హీరోలకు ఆయనిచ్చే ఎలివేషన్ మ్యూజిక్కు అభిమానులు చొక్కాలు చింపుకుని చిందులేస్తున్నారు. విక్రమ్లో కమల్కు, జైలర్లో రజనీకు అనిరుధ్ ఇచ్చిన మాస్ మ్యూజిక్కు తమిళ తంబిలే కాదు.. తెలుగు కుర్రాళ్లు సైతం పిచ్చ పిచ్చగా ఎంజాయ్ చేస్తున్నారు.
మా హీరోలకు ఇలాంటి ఎలివేషన్ మ్యూజిక్ పడితే బాగుండు అనుకునే తెలుగు అభిమానులు లేకపోలేరు. ఇక అనిరుధ్కు ఇప్పుడు మాములు క్రేజ్ లేదు. ఆయనతో మ్యూజిక్ కొట్టించుకోవడానికి పలువురు నిర్మాతలు రూ.10 కోట్లు కూడా ఆఫర్ చేస్తున్నట్లు చెన్నై టాక్. ఒక మ్యూజిక్ డైరెక్టర్కు ఈ రేంజ్లో పారితోషికం ఆఫర్ చేస్తున్నారంటే మాములు విషయం కాదు. ఇప్పుడున్న చాలా మంది హీరోల రెమ్యునరేషన్ కూడా ఆ స్థాయిలో లేదు. నిజానికి అనిరుధ్ ఈ రెమ్యునరేషన్కు వర్త్ అనే చెప్పాలి. ఆయన మ్యూజిక్ వినడానికి మళ్లీ మళ్లీ థియేటర్లకు వెళ్లే ప్రేక్షకులు ఎందరో. పైగా మ్యూజిక్ ప్లాట్ఫార్మ్లలో, యూట్యూబ్లో ఆయన పాటలున్న డిమాండ్ అంతా ఇంతా కాదు.
అవీ కాకుండా అనిరుధ్ మ్యూజిక్ కొడుతున్నాడంటే చాలు.. పలు మ్యూజిక్ కంపెనీలు ఆడియో రైట్స్ కోసం ఎంతైన పెట్టడానికి పోటీ పడుతున్నాయి. ఇవన్నీ దృష్టిలో పెట్టుకుని పలువురు నిర్మాతలు అనిరుధ్కు రూ.10 కోట్ల రేంజ్లో ఆఫర్ చేస్తున్నారట. అయితే అనిరుధ్ మాత్రం రెమ్యునరేషన్ గురించి ఆలోచించకుండా.. ప్రస్తుతం తను చేస్తున్న సినిమాలు పూర్తయిన తర్వాతే వేరే సినిమాలకు కమిట్ అయ్యేలా నిర్ణయం తీసుకున్నాడట.
ఇక ప్రస్తుతం అనిరుధ్ చేతిలో భారీ పాన్ ఇండియా ప్రాజెక్ట్లున్నాయి. ప్రస్తుతం తను కంపోజ్ చేసిన జవాన్ రిలీజ్కు సిద్ధంగా ఉంది. అనిరుధ్కు తొలి హిందీ సినిమా ఇదే. ఇప్పటికే రిలీజైన జిందా బందా పాటకు హిందీ నాట సంచలనాలు సృష్టిస్తుంది. దీనితో పాటుగా తమిళ్లో దళపతి విజయ్ లియోకు పనిచేస్తున్నాడు. ప్రస్తుతం ఈ సినిమాకు బ్యాక్గ్రౌండ్ మ్యూజిక్లో కొట్టే పనిలో ఉన్నాడు. వీటితో పాటుగా ఇండియన్-2, దేవర, విజయ్ దేవరకొండ-గౌతమ్ తిన్ననూరి ఇలా తీరిక లేకుండా బిజీగా గడుపుతున్నాడు.