Allari Naresh | అల్లరి నరేశ్లో కామెడీ కంటే సీరియస్నే ఎక్కువ ఇష్టపడుతున్నారు ప్రేక్షకులు. నటుడిగా ఆయనకు మంచి పేరు తెచ్చిన సినిమాలన్నీ సీరియస్ రోల్సే కావడం అందుకు ఉదాహరణ. త్వరలోనే ‘బచ్చల మల్లి’గా మరో సీరియస్ రోల్లో కనిపించనున్నారు అల్లరి నరేశ్. సుబ్బు మంగదేవి దర్శకత్వంలో రూపొందుతోన్న ఈ చిత్రానికి రాజేశ్ దండా, బాలాజీ గుత్తా నిర్మాతలు. ప్రమోషన్లో భాగంగా విడుదల చేసిన ఈ సినిమా ప్రచార చిత్రాలకు మంచి స్పందన వస్తున్నదని మేకర్స్ ఆనందం వెలిబుచ్చారు.
సెప్టెంబర్లో సినిమా విడుదల చేయనున్నట్టు ఇప్పటికే ప్రకటించారు. తాజాగా ఈ సినిమా డబ్బింగ్ కార్యక్రమాలు మొదలయ్యాయి. నరేశ్ కెరీర్లో ఇప్పటివరకూ చేయని మాస్ కేరక్టర్ ఇందులో చేస్తున్నారని, మునుపెన్నడూ చూడని కొత్త అవతారంలో నరేశ్ని డైరెక్టర్ సుబ్బు ప్రజెంట్ చేస్తున్నారని నిర్మాతలు తెలిపారు. అమృత అయ్యర్ కథానాయికగా నటిస్తున్న ఈ చిత్రంలో రోహిణి, రావురమేశ్, అచ్యుత్కుమార్ ఇతర పాత్రధారులు. ఈ చిత్రానికి కెమెరా: రిచర్డ్స్ ఎం.నాథన్, సంగీతం: విశాల్ చంద్రశేఖర్, నిర్మాణం: హాస్య మూవీస్.