కథలోని బలాన్ని మరింత పెంచేది నటీనటులే. ఎంతమంది పేరున్న నటీనటులు ఉంటే ఆ చిత్రం అంత క్రేజ్ తెచ్చుకుంటుంది. ప్రస్తుతం మహేష్ బాబు, త్రివిక్రమ్ కాంబో మూవీకి ఇలాంటి ప్రయత్నమే జరుగుతున్నట్లు తెలుస్తున్నది. ఖర్చుకు రాజీ పడకుండా సినిమా కోసం ప్యాడింగ్ ఆర్టిస్టులను ఎంచుకున్నట్లు సమాచారం. ఈ చిత్రంలోని ఓ కీలక పాత్రకు మాజీ విశ్వసుందరి ఐశ్వర్యారాయ్ను చిత్రబృందం సంప్రదిస్తున్నారట. ఈ చిత్రంలో ఐశ్వర్య అరంగేట్రం జరిగితే అది మహేష్ చిత్రానికి అదనపు ఆకర్షణ కానుంది.
ఐశ్వర్యా తెలుగులో నటించకున్నా ఆమెను మన ప్రేక్షకులు బాగా అభిమానిస్తారు. ఆమె ఇటీవల తమిళ అనువాద చిత్రం ‘పొన్నియన్ సెల్వన్ 1’ తో తెలుగు ప్రేక్షకుల ముందుకొచ్చింది. నందిని పాత్రలో ఆకట్టుకుంది. మహేష్ కొత్త చిత్రంలో ఐశ్వర్యారాయ్ క్యారెక్టర్ గురించి చిత్రబృందం అఫిషీయల్గా వెల్లడించాల్సి ఉంది. హారికా హాసినీ క్రియేషన్స్ నిర్మిస్తున్న ఈ చిత్రం ప్రస్తుతం రెగ్యులర్ షూటింగ్ జరుపుకుంటున్నది. పూజా హెగ్డే, శ్రీలీల నాయికలుగా నటిస్తున్నారు. ఆగస్టు 11న ఈ చిత్రాన్ని విడుదల చేస్తామ ని చిత్రబృందం ప్రకటించారు.