Actress Kriti Kharbanda | బోలెడంత టాలెంట్, చక్కటి రూపం, ఆకట్టుకునే నటన.. ఇలా అన్నీ ఉన్నా అదృష్టం కలిసిరాక స్టార్ హీరోయిన్ రేంజ్కు వెళ్లలేకపోయింది ఢిల్లీ బ్యూటీ కృతి కర్భందా. ఇక ఇదిలా ఉంటే తాజాగా కృతి గతంలో తనకు ఎదురైన ఓ చేదు అనుభవం గురించి ఓ ఇంటర్వూలో చెప్పుకొచ్చింది. ఓ కన్నడ మూవీ షూటింగ్ సమయంలో తాను ఉంటున్న హోటల్ రూమ్లో సీక్రెట్ కెమెరాను గుర్తించినట్లు కృతి చెప్పింది. ఆ హోటల్లో పనిచేస్తున్న ఓ వ్యక్తి తన గదిలో ఓ సీక్రెట్ కెమెరా పెట్టాడని చెప్పింది. మాములుగా తను ఎక్కడికి వెళ్లిన ఒకసారి రూమ్ చెక్ చేసుకోవడం తనకు, తన టీమ్కు అలవాటుందని.. దాంతో అలా రూమ్ ఒకసారి చెక్ చేస్తుండుగా సెటప్ బాక్స్ బ్యాక్ సైడ్ కెమెరా ఉందని గుర్తించినట్లు ఈ బ్యూటీ వెల్లడించింది.
ఆ ఘటన తనను ఎంతో భయపెట్టిందని, అప్పటి నుంచి ఎక్కడ స్టే చేసినా చాలా జాగ్రత్తగా ఉంటానని కృతి చెప్పుకొచ్చింది. పద్నాలుగేండ్ల కిందట బోణి సినిమాతో వెండితెరపైకి ఎంట్రీ ఇచ్చిన కృతి తొలిసినిమాతోనే మంచి మార్కులు కొట్టేసింది. దాంతో ఏకంగా పవన్ కళ్యాణ్ పక్కన తీన్మార్లో నటించే బంపర్ ఆఫర్ పట్టేసింది. అనురాధగా తన నటనతో అందరినీ మెప్పించింది. అయితే సినిమా పెద్దగా ఆడకపోవడంతో కృతి లైమ్లోకి రాలేకపోయింది. ఆ తర్వాత మిస్టర్ నూకయ్య, ఒంగోలు గిత్త, యాక్షన్ 3డీ ఇలా బ్యాక్ టు బ్యాక్ సినిమాలు చేసిన హిట్లు కొట్టలేకపోయింది. ఇక బ్రూస్లీలో రామ్చరణ్ అక్కగా నటించి సైడ్ హీరోయిన్ ట్రాక్ ఎక్కేసింది. ఆ తర్వాత ఇప్పటివరకు ఈ బ్యూటీ తెలుగులో ఒక్క సినిమా కూడా చేయలేదు.