OTT Stars | ‘టైమ్ వచ్చినప్పుడు అస్సలు టైమ్ ఉండదు..’ సినీజనాలకు బాగా వర్తించే డైలాగ్ ఇది. సక్సెస్లో ఉన్న యాక్టర్లకు తీరిక ఉండదు. కాల్షీట్లు హాట్ కేకుల్లా అమ్ముడవుతుంటాయి. ఇప్పుడు ఈ సూత్రం ఓటీటీ యాక్టర్లకు మరింత అన్వయం అవుతుంది. ఓటీటీలో సత్తాచాటుతున్న నటుల కోసం నిర్మాణ సంస్థలు క్యూ కడుతున్నాయి. ‘మీకు టైమ్ ఉన్నప్పుడే ప్రాజెక్టు మొదలుపెడతామ’ని ఓటీటీ స్టార్లను బతిమాలుకుంటున్నాయి.
ఓటీటీ వచ్చినప్పుడు ‘ఫోన్లో ఎంతమంది చూస్తారు?’ అనుకున్నారు. కానీ, ఇప్పుడు ఓటీటీ కంటెంట్కే మా ఓటు అంటున్నారు ప్రేక్షకులు. ఇక్కడ హిట్టయిన నటులు.. సినిమా అవకాశాలు వచ్చినా ఓకే చెప్పలేనంత బిజీ అయిపోయారు. మనోజ్ బాజ్పాయ్, షెఫాలీ షా, పంకజ్ త్రిపాఠి తదితర నటుల కాల్షీట్ల కాస్ట్ అమాంతం పెరిగిపోయింది. ఒక్కో కాల్షీట్కు రూ.7 లక్షల వరకు డిమాండ్ చేస్తున్నారట. మొత్తంగా ఒక వెబ్సిరీస్కు రూ.3 కోట్ల నుంచి రూ.5 కోట్లు తీసుకునే రేంజ్కు చేరుకున్నారు. అంతేకాదు, కథ అంతా సిద్ధమైనా.. ఈ స్టార్ల డేట్లు కుదరకపోతే ఆ ప్రాజెక్టును అటకెక్కిస్తున్నారు.
సీనియర్ల సంగతి పక్కన పెడితే.. అనామకంగా వచ్చి ఒక్క వెబ్సిరీస్తో స్టార్డమ్ తెచ్చుకుంటున్నవారు కూడా ఉంటున్నారు. ‘ఫ్యామిలీమ్యాన్’ వెబ్సిరీస్లో పోలీసు పాత్ర పోషించిన శ్రేయ ధన్వంతరి ఇప్పుడు బిజీ ఆర్టిస్ట్. ‘1992 స్కామ్’ వెబ్సిరీస్తో సూపర్స్టార్ అయిపోయింది. నాటకరంగ అనుభవంతో సినిమాల్లో అదృష్టం పరీక్షించుకున్న జైదీప్ అహ్లావత్ ఇప్పుడు టాక్ ఆఫ్ ది ఇండస్ట్రీగా మారాడు. ఇలా ఎందరో నటులు ఓటీటీలో మేటి అనిపించుకున్నారు. వాళ్ల కోసం దర్శక, నిర్మాతలు ఎదురుచూసే స్థాయికి చేరుకున్నారు.