UPI | న్యూఢిల్లీ, మే 13: ఫుడ్ డెలివరీ యాప్ జొమాటో.. పేమెంట్స్ సేవలకు గుడ్బై చెప్పింది. తమ పేమెంట్ అగ్రిగేటర్, వాలెట్ లైసెన్స్ను రిజర్వ్ బ్యాంక్ ఆఫ్ ఇండియా (ఆర్బీఐ)కు జొమాటో పేమెంట్ ప్రైవేట్ లిమిటెడ్ (జెడ్పీపీఎల్) స్వచ్చందంగా అప్పగించింది. ఈ మేరకు జెడ్పీపీఎల్ మాతృ సంస్థ జొమాటో సోమవారం తెలియజేసింది.
‘ఆన్లైన్ పేమెంట్స్ విభాగంలో ప్రత్యర్థి సంస్థలకు పెద్దగా పోటీనివ్వలేకపోయాం. అందుకే ఈ పేమెంట్స్ వ్యాపారం మాకు అంతగా లాభదాయకం కాదని గ్రహించాం. ఈ క్రమంలోనే పేమెంట్ అండ్ సెటిల్మెంట్స్ సిస్టమ్స్ యాక్ట్ 2007 కింద ఆర్బీఐ నుంచి పొందిన లైసెన్స్ను తిరిగి ఇచ్చేశాం’ అని జొమాటో స్పష్టం చేసింది.
2021 ఆగస్టులో జెడ్పీపీఎల్ మొదలైంది. అదే ఏడాది నవంబర్లో ఆర్బీఐకి లైసెన్స్ కోసం దరఖాస్తు చేసుకున్నది. నిరుడు మే నెలలో గూగుల్ పే, పేటీఎం, ఫోన్పేలకు పోటీగా జొమాటో యూపీఐ సేవల కోసం ఐసీఐసీఐ బ్యాంక్తో చేతులు కలిపింది. ఇక ఈ ఏడాది జనవరిలో ఆర్బీఐ నుంచి లైసెన్స్ వచ్చింది. కానీ ఇంతలోనే జొమాటో వెనక్కి తగ్గడం గమనార్హం. ఇదిలావుంటే జెడ్పీపీఎల్లో జొమాటో రూ.39 కోట్ల పెట్టుబడులను పెట్టింది.
లాభాల్లోకి జోమాటో
మార్చి త్రైమాసికానికిగాను జొమాటో రూ.175 కోట్ల కన్సాలిడేటెడ్ నికర లాభాన్ని ఆర్జించింది. క్రితం ఏడాది ఇదే త్రైమాసికంలో సంస్థకు రూ.188 కోట్ల నష్టాన్ని నమోదు చేసుకున్నది. అలాగే ఏడాది క్రితం రూ.2,056 కోట్లుగా ఉన్న కంపెనీ కన్సాలిడేటెడ్ ఆదాయం గత త్రైమాసికానికిగాను రూ.3,562 కోట్లకు ఎగబాకింది.