Central Budget | న్యూఢిల్లీ, జూన్ 24: వేతన జీవుల కోసం పన్ను రిబేటును పెంచాలని ట్రేడ్ యూనియన్లు కోరుతున్నాయి. ముందస్తు బడ్జెట్ సమావేశాల్లో భాగంగా సోమవారం కేంద్ర ఆర్థిక శాఖ మ్రంతి నిర్మలా సీతారామన్తో వివిధ వాణిజ్య, వర్తక సంఘాల నాయకులు భేటీ అయ్యారు. ఈ సందర్భంగా ఉద్యోగులకు తమ జీతం, గ్రాట్యుటీలపై ఇప్పుడున్న ఆదాయ పన్ను (ఐటీ) రిబేటు సీలింగ్ పరిమితిని భారీగా పెంచాలన్నారు. అలాగే 8వ వేతన సంఘాన్ని ఏర్పాటు చేయాలని, కొత్త పెన్షన్ స్కీం (ఎన్పీఎస్)ను రద్దుచేసి.. పాత పెన్షన్ పథకాన్ని (ఓపీఎస్) పునరుద్ధరించాలన్న తదితర డిమాండ్లనూ మంత్రి వద్ద వినిపించారు. వచ్చే నెల పార్లమెంట్లో నిర్మలా సీతారామన్ ఈ ఆర్థిక సంవత్సరానికి (2024-25)గాను పూర్తిస్థాయి బడ్జెట్ను ప్రవేశపెట్టబోతున్నారన్నది తెలిసిందే.
ప్రైవేటీకరణ వద్దు
ప్రభుత్వ రంగ సంస్థ (పీఎస్యూ)ల ప్రైవేటీకరణను కేంద్రం ఆపాలని కూడా ఈ సందర్భంగా ట్రేడ్ యూనియన్లు విజ్ఞప్తి చేశాయి. ఏటా పెద్ద ఎత్తున పీఎస్యూల్లో వాటాలను ఉపసంహరిస్తున్న మోదీ సర్కారు.. అందుకోసం లక్ష్యాలను పెట్టుకొనిమరీ ముందుకెళ్తున్న విషయం తెలిసిందే. ఇప్పటికే ఎయిర్ ఇండియా వంటి సంస్థలను ప్రైవేట్ సంస్థలకు అమ్మేసిన సంగతీ విదితమే. కాగా, అసంఘటిత రంగ కార్మికులు, వ్యవసాయ కూలీల కోసం ఓ సామాజిక భద్రతా నిధిని ప్రభుత్వమే ఏర్పాటు చేయాలని, నెలనెలా కనీసం రూ.9,000 పెన్షన్తోపాటు ఇతరత్రా వైద్య, విద్య ప్రయోజనాలను దానిద్వారా అందించాలని కూడా తమ మెమరాండంలో మంత్రికి యూనియన్లు సూచించాయి.
ఈవీలపై జీఎస్టీ హేతుబద్ధం చేయాలి
విద్యుత్తు ఆధారిత వాహనాల (ఈవీ)పై జీఎస్టీ రేట్లను హేతుబద్ధీకరించాలని ఆటో కంపోనెంట్స్ ఇండస్ట్రీ సంఘం (ఏసీఎంఏ) కేంద్ర ఆర్థిక, భారీ పరిశ్రమల మంత్రిత్వ శాఖలకు సమర్పించిన సిఫార్సుల్లో కోరింది. అలాగే పెట్టుబడులకు ప్రోత్సాహకాలు కల్పించాలని, ప్లాంట్-మెషినరీలపై డిప్రిషియేషన్ రేట్ల 15 నుంచి 25 శాతానికి పెంచాలని సూచించింది. ఐటీ చట్టంలోని సెక్షన్ 194ఆర్ కింద వ్యాపార ప్రయోజనాలపై పన్ను కోతలపైనా ప్రభుత్వం స్పష్టత ఇవ్వాలని డిమాండ్ చేసింది. కస్టమ్స్ చట్టాల కింద వారసత్వ వివాదాల పరిష్కారార్థం ఆమ్నెస్టీ స్కీంను తేవాలని ఏసీఎంఏ అధ్యక్షుడు శ్రద్ధా సూరీ మార్వా అన్నారు.