WhatsApp | ప్రముఖ ఇన్స్టంట్ మెసేజింగ్ ప్లాట్ఫామ్ వాట్సాప్. ప్రపంచవ్యాప్తంగా అత్యధికంగా వినియోగిస్తున్న యాప్స్లో వాట్సాప్ ఒకటి. ఈ క్రమంలో యూజర్లను ఆకట్టుకునేందుకు ఎప్పటికప్పుడు సరికొత్త ఫీచర్స్ను పరిచయం చేస్తూ వస్తున్నది. తాజాగా యూజర్లకు మరో గుడ్న్యూస్ చెప్పింది. త్వరలో వాట్సాప్ అగ్మెంటెడ్ రియాలిటీ (AR) ఫీచర్ను పరిచయం చేసేందుకు రెడీ అవుతున్నది. ఈ విషయాన్ని వాట్సాప్ని ట్రాక్ చేసే వాబీఇన్ఫో తెలిపింది. ప్రస్తుతం ఏఆర్ ఫీచర్ను ఆండ్రాయిడ్ బీటా వెర్షన్లో పరీక్షిస్తుందని పేర్కొంది. వాట్సాప్ 2.24.13.14. బీటా వెర్షన్లో టెస్టింగ్ దశలో ఉందని వాబీ ఇన్ఫో పేర్కొంది.
ఏఆర్ ఫీచర్ అందుబాటులోకి వస్తే యూజర్లు వీడియో కాలింగ్ సమయంలో అనేక ఎఫెక్ట్ను ఉపయోగించుకునే అవకాశం ఉంది. బీటా వెర్షన్లో ఏఆర్ ఎఫెక్ట్లను చూడగలిగే ఫీచర్ స్క్రీన్షాట్ సైతం కనిపించింది. ఏఆర్ ఎఫెక్ట్లతో యూజర్లు వీడియో కాల్ల సమయంలో డైనమిక్ ఫేషియల్ ఫిల్టర్లను సైతం ఉపయోగించుకోవచ్చు. అప్డేట్ అందుబాటులోకి వచ్చాక అనేక రకాల లైట్ ఎఫెక్ట్లు సైతం అందుబాటులో ఉంటాయి. ఇదిలా ఉండగా.. ఏఆర్ ఫీచర్తో పాటు వాట్సాప్ మరో ఫీచర్పై పని చేస్తుందని వాబీఇన్ఫో తెలిపింది. యూజర్లు వీడియో కాల్ల సమయంలో బ్యాక్గ్రౌండ్ని ఎడిట్ చేసుకునే ఫీచర్పై పని చేస్తుందని పేర్కొంది.