Stocks | ప్రధాని నరేంద్రమోదీ సారధ్యంలోని ఎన్డీఏ కూటమి మూడో విడుత ప్రభుత్వంపై ఇన్వెస్టర్ల ఆశలు పెరిగాయి. దీంతో బుధవారం దేశీయ స్టాక్ మార్కెట్లు భారీ లాభాలతో ముగిశాయి. ఈ నెల 8వ తేదీన భారత ప్రధానిగా నరేంద్రమోదీ మూడోసారి ప్రమాణ స్వీకారం చేయనున్న సంగతి తెలిసిందే. బీఎస్ఈ ఇండెక్స్ సెన్సెక్స్ 2303 పాయింట్లు (3.2 శాతం) లబ్ధి పొంది 74,382 పాయింట్ల వద్ద ముగిస్తే, ఎన్ఎస్ఈ సూచీ నిఫ్టీ 737 పాయింట్లు (3.36 శాతం) లాభంతో 22,600 పాయింట్ల మార్కును దాటి 22,620 పాయింట్ల వద్ద ముగిసింది. ఇంట్రాడే ట్రేడింగ్లో బీఎస్ఈ ఇండెక్స్ సెన్సెక్స్ 74,535 పాయింట్ల, ఎన్ఎస్ఈ సూచీ నిఫ్టీ 22,670 పాయింట్ల జీవిత కాల గరిష్టాన్ని తాకాయి.
బీఎస్ఈ-30 ఇండెక్స్లో ఇండస్ఇండ్ బ్యాంక్, మహీంద్రా అండ్ మహీంద్రా, టాటా స్టీల్, యాక్సిస్ బ్యాంక్, హెచ్డీఎఫ్సీ బ్యాంక్, బజాజ్ ఫైనాన్స్, కోటక్ మహీంద్రా బ్యాంక్, ఐసీఐసీఐ బ్యాంకు, హెచ్యూఎల్, జేఎస్డబ్ల్యూ స్టీల్, ఏషియన్ పెయింట్స్, నెస్లే ఇండియా, మారుతి సుజుకి, విప్రో, ఐటీసీ స్టాక్స్ మూడు నుంచి ఏడు శాతం వరకు లాభ పడ్డాయి. ఎల్ అండ్ టీ మాత్రమే నష్టపోయింది.
నిఫ్టీ మెటల్, నిఫ్టీ ప్రైవేట్ బ్యాంక్ ఇండెక్స్లు ఐదు శాతం చొప్పున, నిఫ్టీ బ్యాంక్, నిఫ్టీ ఆటో ఇండెక్సులు నాలుగు శాతం చొప్పున లాభ పడ్డాయి. బీఎస్ఈ మిడ్ క్యాప్ నాలుగు, స్మాల్ క్యాప్ మూడు శాతం లాభాలతో ముగిశాయి. బుధవారం స్టాక్ మార్కెట్లలో ట్రేడింగ్ ముగిసిన తర్వాత బీఎస్ఈ లిస్టెడ్ కంపెనీల మార్కెట్ క్యాపిటలైజేషన్ రూ.4,07,79,233.57 కోట్లకు పెరిగింది. ఎగ్జిట్ పోల్స్ అంచనాలకు భిన్నంగా సార్వత్రిక ఎన్నికల ఫలితాలు రావడంతో ఇన్వెస్టర్ల సెంటిమెంట్ బలహీన పడటంతో మంగళవారం బీఎస్ఈ ఇండెక్స్ సెన్సెక్స్ 3,000 పై చిలుకు పాయింట్లు నష్టపోగా, బీఎస్ఈ లిస్టెడ్ కంపెనీ మార్కెట్ క్యాపిటలైజేషన్ రూ.21 లక్షల కోట్ల మేరకు పడిపోయాయి.