Stocks | దేశీయ స్టాక్ మార్కెట్లలో బుధవారం చివర్లో ఇన్వెస్టర్లు అమ్మకాలకు దిగడంతో ఇండెక్సులు స్వల్ప లాభాలతో ముగిశాయి. అటు బీఎస్ఈ ఇండెక్స్ సెన్సెక్స్, ఇటు ఎన్ఎస్ఈ సూచీ నిఫ్టీ కూడా ప్రైవేట్ బ్యాంకుల దన్నుతో తాజాగా సరికొత్త రికార్డులు నమోదు చేశాయి. బీఎస్ఈ సెన్సెక్స్ ఇంట్రాడే ట్రేడింగ్లో 77,852 పాయింట్ల జీవితకాల గరిష్టాన్ని తాకి, ట్రేడింగ్ ముగిసే సమయానికి 36 పాయింట్ల లబ్ధితో 77,337 పాయింట్ల వద్ద ముగిసింది. ఎన్ఎస్ఈ నిఫ్టీ సైతం అంతర్గత ట్రేడింగ్లో 23,664 పాయింట్ల ఆల్ టైం రికార్డు నెలకొల్పి ముగిసే సమయానికి 23,516 పాయింట్ల వద్ద స్థిర పడింది.
బీఎస్ఈ-30 సెన్సెక్స్లో యాక్సిస్ బ్యాంక్, హెచ్డీఎఫ్సీ బ్యాంక్, కొటక్ మహీంద్రా బ్యాక్, ఐసీఐసీఐ బ్యాంకు, ఇండస్ ఇండ్ బ్యాంక్, ఎస్బీఐ స్టాక్స్ ఒక శాతం నుంచి మూడు శాతం మధ్య లాభాలు గడించాయి. మరోవైపు టైటాన్, మారుతి సుజుకి, ఎల్ అండ్ టీ, భారతీ ఎయిర్టెల్, ఎన్టీపీసీ, రిలయన్స్ ఇండస్ట్రీస్, పవర్ గ్రిడ్, బజాజ్ ఫైనాన్స్, ఐటీసీ, హెచ్యూఎల్ తదితర స్టాక్స్ 3.4 శాతం వరకూ పతనం అయ్యాయి.
బీఎస్ఈ మిడ్ క్యాప్ ఇంట్రాడే ట్రేడింగ్లో 46,442.9 పాయింట్ల ఆల్ టైం రికార్డు స్థాయికి చేరుకుని ట్రేడింగ్ ముగిసే సమయానికి 45,833.5 పాయింట్ల (0.91 శాతం నష్టం) వద్ద స్థిర పడింది. మరోవైపు స్మాల్ క్యాప్ సైతం 51,968.25 పాయింట్ల రికార్డు స్థాయికి దూసుకెళ్లి ట్రేడింగ్ ముగిసే వేళకు 51,393 పాయింట్లు (0.58 శాతం నష్టం)తో ముగిసింది. నిఫ్టీ బ్యాంక్ రెండు శాతం లాభంతో ముగియగా, ఇంట్రాడే ట్రేడింగ్ లో 51,957 పాయింట్ల వద్ద స్థిర పడింది. ఫారెక్స్ మార్కెట్లో యూఎస్ డాలర్ మీద రూపాయి మారకం విలువ రూ.85.4538 వద్ద ముగిసింది.