న్యూఢిల్లీ, ఫిబ్రవరి 9: ట్రాక్టర్ల తయారీలో అగ్రగామి సంస్థల్లో ఒకటైన సోనాలికా..దేశీయ మార్కెట్లోకి ఒకేసారి పది ట్రాక్టర్లను అందుబాటులోకి తీసుకొచ్చింది. టైగర్ సిరీస్లో భాగంగా విడుదల చేసిన ఈ ట్రాక్టర్లు 40 హెచ్పీల నుంచి 75 హెచ్పీ సామర్థ్యంతో రూపొందించింది. దేశీయ రైతులకు, పరిస్థితులకు తగ్గట్టుగా యూరప్లో తయారైన వాటిలో ఐదు అత్యంత శక్తివంతమైన మాడళ్లు కాగా, మరో ఐదు మల్టీ-స్పీడ్ ట్రాన్స్మిషన్ మాడళ్లని తెలిపింది.
వీటిలో 4,712 సీసీ ఇంజిన్తో తయారైన నాలుగు ట్రాక్టర్లు కూడా ఉన్నాయి. 5 హైడ్రాలిక్స్ కలిగిన ఈ ట్రాక్టర్లు 2,000-2,500 కిలోల సరుకును అవలీలగా తీసుకెళ్లనున్నది. వీటి ధర ఏ స్థాయిలో ఉంటుందో మాత్రం సంస్థ వెల్లడించలేదు. దేశీయంగా ట్రాక్టర్ల పరిధిని మరింత విస్తరించాలనే ఉద్దేశంతో రూపొందించిన పలు మాడళ్లను ప్రవేశపెట్టినట్టు కంపెనీ వైస్ చైర్మన్ అమృత్ సాగర్ మిట్టల్ తెలిపారు.