Akhilesh Yadav – Union Budget | అధికారాన్ని కాపాడుకోవడంపైనే ప్రధాని నరేంద్రమోదీ దృష్టి పెట్టారని సమాజ్ వాదీ పార్టీ అధ్యక్షుడు, కన్నౌజ్ ఎంపీ అఖిలేశ్ యాదవ్ ఆరోపించారు. ప్రస్తుత ఆర్థిక సంవత్సరం (2024-25) బడ్జెట్లో ఆంధ్రప్రదేశ్, బీహార్ రాష్ట్రాలకు భారీ కేటాయింపులు చేశారు. కేంద్రంలోని మోదీ సర్కార్ మనుగడ కొనసాగాలంటే ఆంధ్రప్రదేశ్, బీహార్ రాష్ట్రాలు చాలా ముఖ్యం అని గుర్తు చేశారు. దేశంలోనే అతిపెద్ద రాష్ట్రం ఉత్తరప్రదేశ్కు బడ్జెట్ కేటాయింపులు ఎందుకు లేవని అఖిలేశ్ యాదవ్ ప్రశ్నించారు.
కేంద్ర ఆర్థిక మంత్రి నిర్మలా సీతారామన్ బడ్జెట్ ప్రతిపాదనలు సమర్పించిన తర్వాత మంగళవారం లోక్ సభ వాయిదా పడింది. తర్వాత అఖిలేశ్ యాదవ్ మీడియాతో మాట్లాడుతూ.. ‘ఒకవేళ ప్రభుత్వం మనుగడ కాపాడుకోవాలంటే బీహార్, ఆంధ్రప్రదేశ్ రాష్ట్రాలకు ప్రత్యేక పథకాలు ప్రకటించడం మంచి విషయం. కానీ, దేశానికి ప్రధానమంత్రిని అందించిన ఉత్తరప్రదేశ్ రాష్ట్రానికి, ఆ రాష్ట్ర రైతాంగం కోసం ఏదేనా పెద్ద నిర్ణయం ప్రకటించారా? రైతుల పంటల దిగుబడి పెంపు, పంటల ధరల పెంపునకు ఏ నిర్ణయమైనా తీసుకున్నారా?’ అని నిలదీశారు.
రైతాంగానికి శాశ్వత ఉద్యోగాలు కల్పించనంత వరకూ ప్రజలకు ప్రధాన ఉపశమనం లభించదని అఖిలేశ్ యాదవ్ పేర్కొన్నారు. గత పదేండ్లలో పెరిగిన నిరుద్యోగ సమస్యను తగ్గించడానికి కేంద్ర ప్రభుత్వం ఉన్న ప్రణాళికేమిటని ప్రశ్నించారు. కేంద్ర ఆర్థిక మంత్రి నిర్మలాసీతారామన్..తన బడ్జెట్ ప్రతిపాదనల్లో ఆంధ్రప్రదేశ్ రాష్ట్రానికి భారీ ఆర్థిక సహాయ ప్యాకేజీ, బీహార్కు భారీ ప్రాజెక్టులను ప్రకటించారు. ఆంధ్రప్రదేశ్ సీఎం చంద్రబాబు సారధ్యంలోని టీడీపీ, బీహార్ సీఎం నితీశ్ కుమార్ ఆధ్వర్యంలోని యునైటెడ్ జనతాదళ్ (జేడీయూ) పార్టీలు.. కేంద్రంలోని ఎన్డీఏ ప్రభుత్వంలో కీలక భాగస్వాములు కావడం గమనార్హం.