RBI | లాభాలు గడించడానికి బ్యాంకులు కొన్ని రకాల రిస్కులు చేయడం సరి కాదని ఆర్బీఐ గవర్నర్ శక్తికాంత దాస్ చెప్పారు. ఇటువంటి చర్యలతో ఏమాత్రం లాభాలు రావన్నారు. గురువారం ఆయన కాలేజ్ ఆఫ్ సూపర్వైజర్స్ లో జరిగిన ఓ కార్యక్రమంలో మాట్లాడుతూ సంక్షోభాలను ముందే పసిగట్టి వాటి నివారణకు చర్యలు తీసుకోవడమే ఆర్బీఐ బాధ్యత అన్నారు. అయితే ప్రతి సారీ సంక్షోభాలు గుర్తించలేం కానీ అందుకు వందశాతం ప్రయత్నిస్తామని చెప్పారు.
బ్యాంకులు సెక్యూరిటీ రహిత రుణాలు మంజూరు చేసే విషయమై ఆర్బీఐ సరైన సమయానికి తగు చర్యలు తీసుకోవడం వల్లే మార్కెట్ కొంత మందగించిందని శక్తికాంత దాస్ చెప్పారు. లేకపోతే ఇందులో బలహీనతలు పెరిగిపోయి సమస్య తీవ్రమయ్యేదన్నారు. వ్యాపారం పెరుగుదలకు చేసే ఆలోచనలు మంచివైనా.. ఏమాత్రం ఆమోదించలేని నిర్ణయాలు తీసుకోరాదన్నారు.
బలమైన రిస్క్ నియంత్రణ వ్యవస్థతోనే సుదీర్ఘకాలంలో విజయం సాధించవచ్చునని శక్తికాంత దాస్ చెప్పారు. ప్రపంచ ఆర్థిక వ్యవస్థ సంక్లిష్టంగా మారుతున్నప్పుడు మన పర్యవేక్షణ వ్యూహాలూ సమయానుకూలంగా ఉండాలన్నారు. అలాగని నియంత్రణ నిబంధనలు తరుచుగా మార్చడం తమ ఉద్దేశం కాదన్నారు. బ్యాంకులు, ఎన్బీఎఫ్సీల వద్ద మొండి బకాయిలు గణనీయంగా తగ్గడంతో దేశీయ ఫైనాన్సియల్ వ్యవస్థ బలంగా ఉందని చెప్పారు.