Ratan Tata- Mukesh Ambani | టెలికం రంగంలో రతన్ టాటా సారధ్యంలోని టాటా గ్రూప్, ముకేశ్ అంబానీ సారధ్యంలోని రిలయన్స్ పోటీ పడనున్నాయా..? అంటే అవుననే సమాధానమే వస్తోంది. జియో ఇటీవల అన్ని రకాల రీచార్జీ ప్లాన్ల ధరలు పెంచేయడం.. సుమారు వెయ్యి గ్రామాలకు 4జీ ఇంటర్నెట్ స్పీడ్ సేవలు అందించేందుకు బీఎస్ఎన్ఎల్ తో టాటా గ్రూప్ అనుబంధ సంస్థ టాటా కన్సల్టెన్సీ సర్వీసెస్ (టీసీఎస్) ఒప్పందం కుదుర్చుకున్నదన్న వార్తలు దీనికి బలం చేకూరుస్తున్నాయి.
ఇటీవల ప్రైవేట్ టెలికం సంస్థలు రిలయన్స్ జియో, భారతీ ఎయిర్టెల్ తమ యూజర్ల రీచార్జీ ప్లాన్ల ధరలు పెంచేశాయి. దీంతో మొబైల్ ఫోన్ యూజర్లు కేంద్ర ప్రభుత్వ రంగ సంస్థ ‘బీఎస్ఎన్ఎల్’కు మారిపోతున్నారని వార్తలొస్తున్నాయి. జియో, ఎయిర్ టెల్ యూజర్లు శరవేగంగా తమ మొబైల్ నంబర్లను బీఎస్ఎన్ఎల్కు పోర్టబిలిటీ కోరుతున్నారని తెలుస్తోంది. రీచార్జీ ప్లాన్ల టారిఫ్లు పెంచడం పట్ల యూజర్లు అసంతృప్తి వ్యక్తం చేస్తూ.. బీఎస్ఎన్ఎల్ కు మళ్లుతున్నారని సోషల్ మీడియాలో ప్రచారం సాగుతోంది. దీనికి తోడు బీఎస్ఎన్ఎల్, టాటా కన్సల్టెన్సీ సర్వీసెస్ (టీసీఎస్0 మధ్య కొత్తగా రూ.15 వేల కోట్ల డీల్ కుదిరిందన్న వార్త కూడా వచ్చింది. సమీప భవిష్యత్లో గ్రామాలకు ఫాస్టర్ ఇంటర్నెట్ స్పీడ్ సేవలు అందించే లక్ష్యంతో బీఎస్ఎన్ఎల్, టీసీఎస్ 1000 గ్రామాలకు 4జీ ఇంటర్నెట్ సేవలు అందించాలన్నది ఈ రెండు సంస్థల మధ్య డీల్ సారాంశంగా ఉన్నట్లు తెలుస్తున్నది.
ప్రస్తుతం 4జీ ఇంటర్నెట్ సర్వీస్ మార్కెట్లో రిలయన్స్ జియో, భారతీ ఎయిర్ టెల్ సంస్థలదే ఆధిపత్యం. ఒకవేళ బీఎస్ఎన్ఎల్ తన స్థానాన్ని మరింత బలోపేతం చేసుకుంటే జియో, ఎయిర్ టెల్ సంస్థలకు సవాల్ విసిరే అవకాశాలు కనిపిస్తున్నాయి. దేశమంతా 4జీ ఇన్ఫ్రాస్ట్రక్చర్ అభివృద్ధి చేసేందుకు వీలుగా నాలుగు రీజియన్ల పరిధిలో టాటా డేటా సెంటర్లను నిర్మిస్తోంది.
ఇటీవల జియో, ఎయిర్ టెల్ రీచార్జీ ప్లాను పెంచడంతో మొబైల్ ఫోన్ యూజర్లు బీఎస్ఎన్ఎల్ వైపు మళ్లడం వేగవంతమైంది. గత నెలలో తొలుత రిలయన్స్ జియో, ఆ మరుసటి రోజు భారతీ ఎయిర్ టెల్ తమ ప్లాన్ల రీచార్జీ ధరలు పెంచేశాయి. అదే బాటలో మరో టెలికం సంస్థ వొడాఫోన్ ఐడియా కూడా రీచార్జీ ప్లాన్ల ధరలు పెంచేసింది. ఈ నెల మూడో తేదీ నుంచి రిలయన్స్ జియో, భారతీ ఎయిర్ టెల్, నాలుగో తేదీ నుంచి వొడాఫోన్ ఐడియా పెంచిన రీచార్జీ ప్లాన్ల ధరలు అమల్లోకి వచ్చాయి. జియో 12-25 శాతం, ఎయిర్ టెల్ 11-21 శాతం, వొడాఫోన్ ఐడియా 10-21 శాతం చార్జీల ధరలు పెంచేడంతో యూజర్లు సోషల్ మీడియాలో పోస్టులు పెడుతున్నారు. జియో, ఎయిర్ టెల్ వైఖరిని నిరసిస్తూ బీఎస్ఎన్ఎల్ వైపు మళ్లుతున్నారు. రిలయన్స్ జియో, ఎయిర్ టెల్ నుంచి సుమారు 1.6 లక్షల మంది యూజర్లు బీఎస్ఎన్ఎల్ పోర్టబిలిటీ తీసుకున్నట్లు విశ్వసనీయంగా తెలిసింది.