Union Minister Nitin Gadkari | భారత ఆటోమొబైల్ రంగంలో భారీ మార్పులు చోటు చేసుకోనున్నాయి. వచ్చే పదేండ్ల కాలంలో భారత్ రోడ్లపై పూర్తిగా పెట్రోల్, డీజిల్ వాహనాలు కనుమరుగయ్యేలా చూడాలని కేంద్రం భావిస్తున్నది. ఈ సంగతి కేంద్ర రోడ్డు రవాణా, జాతీయ రహదారుల శాఖ మంత్రి నితిన్ గడ్కరీ ఇటీవల చెప్పారు. అదే సమయంలో ఎలక్ట్రిక్ వాహనాల (ఈవీ)ను కొనసాగించాల్సిన అవసరం ఉందని పేర్కొన్నారు. సంప్రదాయ వాహనాలకు బదులు ఎలక్ట్రిక్ వాహనాలను వాడటం వల్ల ఒనగూడే ప్రయోజనాలను వెల్లడించారు. హిమాచల్ ప్రదేశ్ లోని మండీలో జరిగిన ఓ సభలో నితిన్ గడ్కరీ మాట్లాడూత 2034 నాటికి పెట్రోల్, డీజిల్ వాహనాలకు తలుపులు మూసేయాలని కేంద్రం భావిస్తోందన్నారు. ప్రస్తుతం మార్కెట్లోకి ప్రతి ఒక్కరూ ఎలక్ట్రిక్ స్కూటర్, కార్లు, బస్సులు వచ్చేస్తున్నాయని తెలిపారు. డీజిల్ మీద రూ.100 ఖర్చు చేస్తే, ఎలక్ట్రిక్ వాహనాల కోసం వినియోగించే విద్యుత్ ఖర్చు రూ.24 మాత్రమేనన్నారు.
తొలి నుంచి కేంద్ర మంత్రి నితిన్ గడ్కరీ క్లీన్ ట్రాన్స్ పోర్ట్ ఆప్షన్లను ప్రోత్సహిస్తున్నారు. జీరో ఎమిషన్ వాహనాలతోపాటు ఆల్టర్నేటివ్ వాహనాల వినియోగం పెంచాలని కోరారు. కాలుష్య నివారణతోపాటు విదేశాల నుంచి ముడి చమురు దిగుమతిపై ఆధార పడటం తగ్గుతుందని, తద్వారా ప్రభుత్వ ఖజానాపై మోయలేని భారం తగ్గుతుందన్నారు. ప్రపంచ వ్యాప్తంగా ప్రధాన మార్కెట్లలో ఎలక్ట్రిక్ వాహనాల విక్రయాలు తగ్గుముఖం పట్టాయి. కానీ, భారత్ మార్కెట్లో ఎలక్ట్రిక్ టూ వీలర్స్, ఎలక్ట్రిక్ త్రీ వీలర్స్ సేల్స్ పెరుగుతున్నాయి. మరోవైపు ఈవీ కార్ల విక్రయాలు గణనీయంగానే పెరిగాయి. 2023లో సుమారు 15 లక్షల ఈవీ వాహనాలు అమ్ముడయ్యాయి. 2022తో పోలిస్తే 50 శాతం ఎక్కువ.
2030 నాటికి ఆటోమొబైల్ రంగంలో ఈవీ కార్ల విక్రయాలు 30 శాతానికి పెంచాలని కేంద్ర ప్రభుత్వం భావిస్తున్నది. పాశ్చాత్య దేశాలతో పోలిస్తే భారత్లో ఈవీ వాహనాల విక్రయాలు స్ఫూర్తిదాయకంగా ఉన్నాయి. అమెరికాలో 2030నాటికి ఈవీ వాహనాల విక్రయాలు 50 శాతం, 2032 నాటికి 67 శాతానికి పెరుగుతాయి. బ్రిటన్లో మొత్తం వాహనాల విక్రయాల్లో ఎలక్ట్రిక్ వాహనాల విక్రయాలు 19 శాతం పెరిగాయి. 2035 నాటికి వందశాతం ఈవీ కార్లే విక్రయించాలని బ్రిటన్ సర్కార్ నిర్ణయించుకున్నది. అయితే చార్జింగ్ స్టేషన్లు, ఈవీల పట్ల అవగాహన కల్పనతోపాటు ఈవీ ఇన్ఫ్రా రంగం పెంచాల్సిన అవసరం ఉందని నిపుణులు నొక్కి చెబుతున్నారు. ప్రపంచ దేశాలతో పోలిస్తే భారత్ మార్కెట్లో ఈవీ కార్లు చౌక కావడం కీలకాంశం కానున్నది. వైవిధ్య భరితమైన భారత్ మార్కెట్లో లక్ష్య సాధనకు సమగ్ర వ్యూహం అమలు చేయాల్సిన అవసరం ఉందని చెబుతున్నారు.