Union Budget 2024-25 | పార్లమెంట్ వర్షాకాల సమావేశాలు సోమవారం నుంచి మొదలు కానున్నాయి. ప్రస్తుత ఆర్థిక సంవత్సరాని (2024-25)కి కేంద్ర ఆర్థిక మంత్రి నిర్మలా సీతారామన్ పూర్తి స్థాయి బడ్జెట్ను మంగళవారం పార్లమెంట్కు సమర్పిస్తారు. వరుసగా ఏడవ బడ్జెట్ ను సమర్పించేందుకు విత్త మంత్రి నిర్మలా సీతారామన్ సర్వం సిద్ధం చేసుకున్నారు. తద్వారా వరుసగా ఏడుసార్లు పార్లమెంటులో కేంద్ర బడ్జెట్ ప్రవేశ పెట్టిన మంత్రిగా నిర్మలా సీతారామన్ రికార్డు నెలకొల్పనున్నారు. ఇప్పటి వరకూ మాజీ ప్రధాని మొరార్జీ దేశాయ్ పేరిట ఆరు వార్షిక బడ్జెట్లు ప్రవేశ పెట్టిన రికార్డు నమోదైంది. 1959-64 మధ్య ఐదు పూర్తిస్థాయి బడ్జెట్లు, ఒక తాత్కాలిక బడ్జెట్ను మొరార్జీ దేశాయ్ ప్రవేశ పెట్టారు.
2019లో నరేంద్రమోదీ సారధ్యంలో రెండో దఫా కేంద్ర ప్రభుత్వం ఏర్పాటైనప్పటి నుంచి 2019-20 ఆర్థిక సంవత్సరం నుంచి 2023-24 ఆర్థిక సంవత్సరం వరకూ వరుసగా ఐదు పూర్తి స్థాయి బడ్జెట్లను కేంద్ర ఆర్థిక మంత్రిగా నిర్మలా సీతారామన్ ప్రవేశపెట్టారు. సార్వత్రిక ఎన్నికల నేపథ్యంలో గత ఫిబ్రవరి ఒకటో తేదీన తాత్కాలిక బడ్జెట్ పార్లమెంటుకు సమర్పించారు. తాజాగా మంగళవారం బడ్జెట్ సమర్పించడంతో మొరార్జీ దేశాయ్ రికార్డును నిర్మలా సీతారామన్ బ్రేక్ చేయనున్నారు. ప్రస్తుత ఆర్థిక సంవత్సరానికి పూర్తి స్థాయి బడ్జెట్ ప్రవేశ పెట్టేందుకు కేంద్ర ఆర్థిక మంత్రిగా నిర్మలా సీతారామన్.. కార్పొరేట్ సంస్థలు, కార్మిక, రైతు సంఘాలు, పారిశ్రామిక సంఘాల ప్రతినిధులతో పలు దఫాలు చర్చలు జరిపారు.
2024-25 ఆర్థిక సంవత్సర బడ్జెట్ ప్రతిపాదనలపై గత నెల 20 నుంచి కార్మిక సంఘాలు, విద్యా ఆరోగ్య రంగ నిపుణులు, సూక్ష్మ చిన్న మధ్య తరహా పరిశ్రమల ప్రతినిధులు, ఆర్థిక వేత్తలతో నిర్మలా సీతారామన్ వరుస సమావేశాలు నిర్వహించారు. పెట్టుబడి వ్యయం పెంపుతోపాటు ద్రవ్యలోటు తగ్గింపుతోపాటు ఉపాధి కల్పనకు తీసుకోవాల్సిన చర్యలపై ఆర్థిక వేత్తలు సూచనలు చేశారు. వచ్చే బడ్జెట్లో పెట్టుబడులను ప్రోత్సహించేందుకు క్యాపిటల్ ఎక్స్ పెండిచర్ పెంచాలని కాన్ఫిడరేషన్ ఆఫ్ ఇండియన్ ఇండస్ట్రీ (సీఐఐ) ప్రతినిధులు కోరారు. వ్యవసాయ రంగానికి కేటాయింపులు పెంచాలని నిర్మలా సీతారామన్ను రైతు ప్రతినిధులు కోరారు. యువశక్తిని ఉపయోగించుకునేందుకు మెరుగైన పద్దతులు అవలంభించాలని నిపుణులు, ఉద్యోగ రంగాల ప్రతినిధులు అభ్యర్థించారు.
పార్లమెంట్ బడ్జెట్ సమావేశాలు ఆగస్టు 12 వరకూ కొనసాగుతాయి. ఈ సమావేశాల్లో ఎయిర్ క్రాఫ్ట్ చట్టం, జమ్ముకశ్మీర్ బడ్జెట్, ప్రకృతి వైపరీత్యాల యాజమాన్య చట్టం, భారతీయ వాయుయాన్ విధేయక్ బిల్లు, కాఫీ (ప్రోత్సాహం, అభివృద్ధి) బిల్లు, రబ్బర్ (ప్రమోషన్ అండ్ డెవలప్ మెంట్) బిల్లు తదితర ఆరు బిల్లును మోదీ ప్రభుత్వం ఆమోదింప చేసుకోవాలని తలపోస్తున్నది.