Stock Market | ముంబై, జూలై 26: దేశీయ స్టాక్ మార్కెట్లు ఎట్టకేలకు వరుస నష్టాల నుంచి తేరుకున్నాయి. శుక్రవారం భారీ లాభాల్లో ముగిశాయి. మదుపరులు కొనుగోళ్ల ఉత్సాహాన్ని ప్రదర్శించడంతో ఉదయం ఆరంభం నుంచే పరుగులు పెట్టిన సూచీలు.. ఆఖరుదాకా అదే ఊపును కొనసాగించాయి. ఈ క్రమంలోనే బాంబే స్టాక్ ఎక్సేంజ్ (బీఎస్ఈ) ప్రధాన సూచీ సెన్సెక్స్ 1,292.92 పాయింట్లు లేదా 1.62 శాతం ఎగిసి 81,332.72 వద్ద నిలిచింది. ఒకానొక దశలో 1,387.38 పాయింట్లు పుంజుకోవడం విశేషం. ఇక నేషనల్ స్టాక్ ఎక్సేంజ్ (ఎన్ఎస్ఈ) సూచీ నిఫ్టీ ఆల్టైమ్ హైని నెలకొల్పింది. 428.75 పాయింట్లు లేదా 1.76 శాతం ఎగబాకి మునుపెన్నడూ లేనివిధంగా 24,834.85 వద్ద స్థిరపడింది. కాగా, అంతకుముందు 5 రోజులపాటు సూచీలు నష్టాలకే పరిమితమయ్యాయి. ఈ నేపథ్యంలోనే సెన్సెక్స్ 1,303.66 పాయింట్లు, నిఫ్టీ 394.75 పాయింట్లు దిగజారాయి. అయినప్పటికీ తాజా భారీ లాభాలతో ఓవరాల్గా ఈ వారం సెన్సెక్స్ 728.07 పాయింట్లు, నిఫ్టీ 303.95 పాయింట్లు పెరిగినైట్టెంది.
ఇన్ఫోసిస్, భారతీ ఎయిర్టెల్, రిలయన్స్ ఇండస్ట్రీస్ లిమిటెడ్ వంటి బడా షేర్లను కొనేందుకు మదుపరులు ఎగబడ్డారు. దీంతో బీఎస్ఈ లార్జ్క్యాప్ ఇండెక్స్ సెన్సెక్స్లో నెస్లే మినహా అన్ని (29) షేర్లు, ఎన్ఎస్ఈ లార్జ్క్యాప్ ఇండెక్స్ నిఫ్టీలో మూడు తప్పించి మిగిలిన (47) షేర్లన్నీ లాభాలను అందుకున్నాయి. భారతీ ఎయిర్టెల్ షేర్ విలువ అత్యధికంగా 4.50 శాతానికిపైగా పెరిగింది. అదానీ పోర్ట్స్, సన్ ఫార్మా, టాటా స్టీల్, హెచ్సీఎల్ టెక్నాలజీస్, జేఎస్డబ్ల్యూ స్టీల్, మహీంద్రా అండ్ మహీంద్రా షేర్లూ ఇన్వెస్టర్లను విశేషంగా ఆకట్టుకున్నాయి. ఆగస్టు నెల డెరివేటివ్స్ గడువు మొదలు, కేంద్ర బడ్జెట్తో ఎదురైన షాకుల నుంచి బయటపడటం, ఏప్రిల్-జూన్ త్రైమాసికంలో కంపెనీల ఆర్థిక ఫలితాలు బాగుండటం వంటివి కలిసొచ్చాయని మార్కెట్ నిపుణులు తాజా ట్రేడింగ్ సరళిని విశ్లేషిస్తున్నారు. ఇక రంగాలవారీగా మెటల్, ఐటీ, ఆటో, కమోడిటీస్, హెల్త్కేర్ షేర్లు జోరుమీదున్నాయి. అలాగే బీఎస్ఈ మిడ్క్యాప్ 2.12 శాతం, స్మాల్క్యాప్ 1 శాతం పెరిగాయి.
అంతర్జాతీయ మార్కెట్ల విషయానికొస్తే.. ఆసియా దేశాల్లో దక్షిణ కొరియా, చైనా, హాంకాంగ్ సూచీలు లాభాల్లో ముగిశాయి. జపాన్ సూచీ నష్టపోయింది. ఐరోపా మార్కెట్లలో ప్రధానంగా ఫ్రాన్స్, బ్రిటన్, జర్మనీ సూచీలు లాభాల్లో కదలాడుతున్నాయి. ఇక గురువారం అమెరికా మార్కెట్లు నష్టాల్లోనే స్థిరపడ్డ సంగతి విదితమే.
వరుస నష్టాలతో పడిపోయిన మదుపరుల సంపద.. తాజా లాభాలతో మళ్లీ పెరిగింది. ఈ క్రమంలోనే రూ.450 లక్షల కోట్ల మార్కును మరోసారి దాటింది. శుక్రవారం ఒక్కరోజే బీఎస్ఈ నమోదిత సంస్థల మార్కెట్ విలువ రూ.7,10,235.45 కోట్లు పుంజుకున్నది. దీంతో ఇంతకుముందెన్నడూ లేనివిధంగా రూ.4,56,92,671.33 కోట్లకు (5.46 ట్రిలియన్ డాలర్లు) ఆయా కంపెనీల సంపద చేరింది.