Union Budget 2024 : మోదీ ప్రభుత్వం మూడో టర్మ్లో 2024-25 ఆర్ధిక సంవత్సరానికి ప్రవేశపెట్టిన తొలి బడ్జెట్ దేశ తక్షణావసరాలను తీర్చడంతో పాటు దీర్ఘకాల వృద్ధికి, మౌలిక వసతుల కల్పనకు బాటలు వేస్తుందని కేంద్ర మంత్రి, బీజేపీ చీఫ్ జేపీ నడ్డా పేర్కొన్నారు. ఆర్ధిక మంత్రి నిర్మలా సీతారామన్ ప్రవేశపెట్టిన బడ్జెట్ సమ్మిళిత వృద్ధిని ప్రతిబింబించేలా ఉందని చెప్పారు.
మౌలిక వసతులకు పెద్దపీట వేస్తూ, వినూత్న సాంకేతికతకు పట్టం కడుతూ వ్యూహాత్మక పెట్టుబడులతో వృద్ధిని పరుగులు పెట్టించే దిశగా బడ్జెట్ దిశానిర్ధేశం చేసేలా ఉందని వ్యాఖ్యానించారు. పౌరులకు నాణ్యమైన జీవితాలు అందించడంతో పాటు ఉపాధి కల్పనకు ఊతం ఇచ్చేలా ఉందని చెప్పారు. ఈ బడ్జెట్ గ్రామీణాభివృద్ధి, పేదరిక నిర్మూలన, మహిళా సంక్షేమం, యువత, దళితులు, గిరిజనుల సంక్షేమానికి దిక్సూచీలా ఉందని ప్రశంసించారు.
సమాజంలో అన్ని వర్గాల ఆకాంక్షలకు అద్దం పట్టేలా బడ్జెట్ను రూపొందించారని చెప్పారు. ఈ బడ్జెట్ దేశ ఆర్ధిక స్ధిరత్వానికి బాటలు పరిచేలా ఉందని అన్నారు. అంతర్జాతీయ సవాళ్లకు ఎదురీది భారత్ ఆర్ధిక వ్యవస్ధ ఎలా నిలబడుతుందన్నదీ ఈ బడ్జెట్ వెల్లడించిందని తెలిపారు. ఇక ప్రస్తుత ఆర్థిక సంవత్సరానికి (Union Budget 2025) సంబంధించిన పూర్తి స్థాయి బడ్జెట్ను కేంద్ర ఆర్థిక మంత్రి నిర్మలా సీతారామన్ మంగళవారం లోక్ సభలో ప్రవేశ పెట్టారు.
ఈ ఆర్థిక సంవత్సరంలో మిగిలిన 8 నెలల కాలానికి వార్షిక బడ్జెట్ను ప్రవేశపెట్టారు. సార్వత్రిక ఎన్నికలకు ముందు ఈ ఏడాది ఫిబ్రవరిలో నిర్మలమ్మ తాత్కాలిక బడ్జెట్ ప్రవేశ పెట్టిన విషయం తెలిసిందే. ఇక కేంద్రంలో మరోసారి మోదీ ప్రభుత్వం అధికారంలోకి రావడంతో ఇవాళ ప్రస్తుత ఆర్థిక సంవత్సరానికి సంబంధించి పూర్తి స్థాయి బడ్జెట్ను ప్రవేశపెట్టారు.
Read More :