Stocks | దేశీయ స్టాక్ మార్కెట్లు బుధవారం స్వల్ప లాభాలతో ముగిశాయి. అమెరికా చిల్లర ద్రవ్యోల్బణం గణాంకాలు, వడ్డీరేట్ల తగ్గింపుపై యూఎస్ ఫెడ్ రిజర్వు నిర్ణయం కోసం ఇన్వెస్టర్లు ఆసక్తిగా ఎదురు చూస్తున్నారు. ఈ నేపథ్యంలో బుధవారం బీఎస్ఈ ఇండెక్స్ సెన్సెక్స్ 150 పాయింట్లు పుంజుకుని 76,607 పాయింట్ల వద్ద స్థిర పడింది. అంతకుముందు ఇంట్రాడే ట్రేడింగ్ లో 600 పాయింట్లు పెరిగి 77,050 పాయింట్ల గరిస్టానికి చేరింది. ఎన్ఎస్ఈ సూచీ నిఫ్టీ ఇంట్రాడే ట్రేడింగ్లో 23,442 పాయింట్ల గరిష్టాన్ని తాకి, ట్రేడింగ్ ముగిసే సమయానికి 58 పాయింట్ల లబ్ధితో 23,323 పాయింట్ల వద్ద స్థిర పడింది. మధ్యాహ్నం తర్వాత ఇన్వెస్టర్లకు అమ్మకాలకు దిగడంతో ఒత్తిడికి గురైన ఇండెక్సులు రికార్డు స్థాయి నుంచి దిగి వచ్చాయి.
ఎన్ఎస్ఈ-50 ఇండెక్సులో కోల్ ఇండియా, పవర్ గ్రిడ్, ఎచిర్ మోటార్స్, ఎస్బీఐ లైఫ్, టెక్ మహీంద్రా, ఎల్ అంట్ టీ మైండ్ ట్రీ, శ్రీరామ్ ఫైనాన్స్, బజాజ్ ఫైనాన్స్, బీపీసీఎల్ స్టాక్స్ ఒక శాతానికి పైగా పుంజుకున్నాయి. మరోవైపు బ్రిటానియా ఇండస్ట్రీస్, మహీంద్రా అండ్ మహీంద్రా, హిందూస్థాన్ యూనీ లివర్ (హెచ్యూఎల్), టైటాన్, టాటా కన్జూమర్, అదానీ పోర్ట్స్, యాక్సిస్ బ్యాంక్, ఇన్ఫోసిస్ స్క్రిప్టులు నష్టాలతో ముగిశాయి. బీఎస్ఈ మిడ్ క్యాప్, స్మాల్ క్యాప్ ఇండెక్సులు ఒక్కో శాతం పుంజుకున్నాయి. నిఫ్టీ మీడియా, నిఫ్టీ పీఎస్యూ బ్యాంకు ఇండెక్సులు రెండు శాతం పుంజుకోగా, ఎఫ్ఎంసీజీ 0.45 శాతం నష్టంతో ముగిసింది.