Market Capitalisation | గతవారం దేశీయ స్టాక్ మార్కెట్లలో ట్రేడింగ్ ముగిసిన తర్వాత బీఎస్ఈ-30లో టాప్-10 సంస్థల్లో ఏడు సంస్థల మార్కెట్ క్యాపిటలైజేషన్ రూ.1.72,225.62 కోట్లు పెరిగింది. వీటిలో ఐటీ దిగ్గజం టాటా కన్సల్టెన్సీ సర్వీసెస్ (టీసీఎస్) భారీగా లబ్ధి పొందింది. గత వారం బీఎస్ఈ ఇండెక్స్ సెన్సెక్స్ 522.74 పాయింట్లు (0.65 శాతం) వృద్ధి చెందింది. శుక్రవారం స్టాక్ మార్కెట్లలో ట్రేడింగ్ ముగిసిన తర్వాత బీఎస్ఈ-30 ఇండెక్స్ సెన్సెక్స్ 622 పాయింట్లు పుంజుకుని 80,519.34 పాయింట్ల వద్ద ముగిసింది. ఇంట్రాడే ట్రేడింగ్ లో సెన్సెక్స్ 996.17 పాయింట్ల లబ్ధితో ఆల్ టైం గరిష్ట స్థాయి 80,893.51 పాయింట్ల వద్దకు దూసుకెళ్లింది.
టాటా కన్సల్టెన్సీ సర్వీసెస్ (టీసీఎస్) మార్కెట్ క్యాపిటలైజేషన్ రూ.62,393.92 కోట్లు వృద్ధి చెంది రూ.15,14,133.45 కోట్లకు చేరుకుంది. శుక్రవారం టీసీఎస్ షేర్ శుక్రవారం దాదాపు ఏడు శాతం పుజుకున్నది. ప్రస్తుత ఆర్థిక సంవత్సరం తొలి త్రైమాసికంలో టీసీఎస్ పుంజుకుని 8.7 శాతం గ్రోత్ తో రూ.12,040 నికర లాభాలు గడించింది. ఇక ఐటీసీ మార్కెట్ క్యాపిటలైజేషన్ రూ.31,858.83 కోట్లు పెరిగి రూ.5,73,258.78 కోట్లకు చేరింది.
ఐటీ దిగ్గజం ఇన్ఫోసిస్ మార్కెట్ క్యాపిటలైజేసన్ రూ. 26,905.14 కోట్లు పెరిగి రూ.7,10,827.27 కోట్లకు పెరిగింది. భారతీయ జీవిత బీమా సంస్థ (ఎల్ఐసీ) ఎం-క్యాప్ రూ. 22,422.12 కోట్ల వృద్ధితో రూ. 6,64,947.01 కోట్ల వద్ద స్థిర పడింది. హిందూస్థాన్ యూనీ లివర్ (హెచ్యూఎల్) ఎం-క్యాప్ రూ. 17,668.92 కోట్లకు పెంచుకుని రూ.6,16,156.81 కోట్ల వద్ద ముగిసింది. రిలయన్స్ మార్కెట్ క్యాపిటలైజేషన్ రూ. 9,066.19 కోట్లు పెరిగి రూ.21,60,628.75 కోట్ల వద్ద నిలిచింది. భారతీ ఎయిర్ టెల్ ఎం-క్యాప్ రూ.1,910.5 కోట్ల వృద్ధితో రూ.8,15,705.36 కోట్లకు చేరుకున్నది.
ప్రముఖ ప్రైవేట్ బ్యాంకు – హెచ్డీఎఫ్సీ బ్యాంక్ మార్కెట్ క్యాపిటలైజేషన్ రూ.18,069.29 కోట్లు హరించుకుపోయి రూ.12,35,825.35 కోట్లకు చేరుకున్నది. భారతీయ స్టేట్ బ్యాంక్ (ఎస్బీఐ) ఎం-క్యాప్ రూ. 356.99 కోట్ల పతనంతో రూ.7,67,204.26 కోట్ల వద్ద స్థిర పడింది. మరో ప్రైవేట్ బ్యాంక్ ఐసీఐసీఐ బ్యాంక్ ఎం-క్యాప్ రూ. 210.5 కోట్ల నష్టంతో రూ.8,67,668.16 కోట్ల వద్ద ముగిసింది.
గతవారం ట్రేడింగ్ ముగిసిన తర్వాత బీఎస్ఈ-30 టాప్ 10 సంస్థల్లో రిలయన్స్ మొదటి స్థానంలో కొనసాగుతోంది. తర్వాతీ స్థానాల్లో టీసీఎస్, హెచ్డీఎఫ్సీ బ్యాంక్, ఐసీఐసీఐ బ్యాంక్, భారతీ ఎయిర్ టెల్, భారతీయ స్టేట్ బ్యాంక్ (ఎస్బీఐ), ఇన్ఫోసిస్, ఎల్ఐసీ, హిందూస్థాన్ యూనీ లివర్ (హెచ్యూఎల్), ఐటీసీ నిలిచాయి.