IRCTC | భారతీయ రైల్వేస్ అనుబంధ.. ఇండియన్ రైల్వేస్ క్యాటరింగ్ అండ్ టూరిజం కార్పొరేషన్ (ఐఆర్సీటీసీ) తన వ్యవస్థాపక వార్షికోత్సవం సందర్భంగా కొత్త ఆఫర్ తీసుకొచ్చింది. ఈ నెల 27 నాటికి ఐఆర్సీటీసీ ఏర్పాటై 24 ఏండ్లు పూర్తయిన సందర్భంగా విమాన టికెట్ల కొనుగోలు దారుల నుంచి కన్వినియన్స్ ఫీజు వసూలు చేయబోమని తెలిపింది. ఈ ఆఫర్ ఈ నెల 25 నుంచి 27 వరకూ మాత్రమే అందుబాటులో ఉంటుందని ‘ఎక్స్ (మాజీ ట్విట్టర్’ ఖాతాలో పేర్కొంది. అంతే కాదు సెప్టెంబర్ 27వ తేదీ.. ప్రపంచ పర్యాటక దినోత్సవం కూడా కావడం గమనార్హం.
ప్రతిఏటా సెప్టెంబర్ 27న ఫౌండేషన్ డే జరుపుకుంటున్న ఐఆర్సీటీసీ.. ఈ మూడు రోజులు తన వెబ్ సైట్ నుంచి విమాన టికెట్లు బుక్ చేసుకున్న ప్రయాణికుల నుంచి కన్వినియన్స్ ఫీజు వసూలు చేయబోమని తెలిపింది. సెలెక్టెడ్ బ్యాంకుల డెబిట్ లేదా క్రెడిట్ కార్డులపై విమాన టికెట్లు బుక్ చేసుకున్న వారికి రూ.2000 అదనపు డిస్కౌంట్ కూడా అందిస్తుంది. అంతే కాదు.. పోర్టల్ నుంచి బుక్ చేసుకునే ప్రతి టికెట్ మీద రూ.50 లక్షల ట్రావెల్ ఇన్సూరెన్స్ అందిస్తుంది.