Infosys Q1 | ప్రముఖ ఐటీ దిగ్గజం ఇన్ఫోసిస్ (Infosys) ప్రస్తుత ఆర్థిక సంవత్సరం (2024-25) తొలి త్రైమాసికం నికర లాభాల్లో ఏడు శాతం వృద్ధి సాధించి రూ.6,368 కోట్ల కన్సాలిడేటెడ్ నికర లాభం గడించింది. అలాగే ప్రస్తుత ఆర్థిక సంవత్సర గ్రోత్ గైడెన్స్ అంచనాలు పెంచేసింది. 2023-24 తొలి త్రైమాసికంలో ఇన్ఫోసిస్ రూ.5,945 కోట్ల నికర లాభం గడించినట్లు బీఎస్ఈ ఫైలింగ్ లో తెలిపింది. అయితే గత ఆర్థిక సంవత్సరం జనవరి-మార్చి త్రైమాసికంతో పోలిస్తే మాత్రం కంపెనీ నికర లాభం 20 శాతం తగ్గింది. గతేడాది మార్చి త్రైమాసికంలో 7,969 కోట్ల నికర లాభం సంపాదించింది. ప్రస్తుత ఆర్థిక సంవత్సరంలో రెవెన్యూ గ్రోత్ గైడెన్స్ 3-4 శాతం ఉంటుందని అంచనా వేసింది. 2024-25లో కంపెనీ గ్రోత్ గైడెన్స్ 1-3 శాతమే ఉంటుందని ఇన్ఫోసిస్ అంచనా వేసిన సంగతి తెలిసిందే.
ప్రస్తుత ఆర్థిక సంవత్సరంలో వృద్ధిరేటును బట్టి 15 వేల నుంచి 20 వేల మంది కొత్త ఉద్యోగులను నియమించుకుంటామని ఇన్ఫోసిస్ ఎండీ కం సీఈఓ సలీల్ పరేఖ్ చెప్పారు. గతేడాదితో పోలిస్తే ఈ ఏడాది జూన్ త్రైమాసికంలో నిర్వహణ లాభాలు 21.1 శాతం పెరిగాయి. ప్రస్తుత ఆర్థిక సంవత్సరంలో 20-22 శాతం నిర్వహణ లాభాలు ఉంటాయని అంచనా వేస్తున్నట్లు సలీల్ పరేఖ్ చెప్పారు. తమ క్లయింట్ల క్లౌడ్ ఫౌండేషన్ డేటాసెట్స్ ఆధారంగా జనరేటివ్ ఏఐపై ఫోకస్ చేసినట్లు తెలిపారు.