ముంబై, ఏప్రిల్ 9: దేశీయ స్టాక్ మార్కెట్ల దూకుడుకు మంగళవారం బ్రేక్ పడింది. నిజానికి ఉదయం ఆరంభంలో మదుపరుల కొనుగోళ్ల మద్దతుతో లాభాల్లో మొదలై సరికొత్త స్థాయిలను చేరిన సూచీలు.. ఆఖర్లో అమ్మకాల ఒత్తిడికి లోనై నష్టాలను మూటగట్టుకున్నాయి. ఈ క్రమంలోనే బాంబే స్టాక్ ఎక్సేంజ్ (బీఎస్ఈ) ప్రధాన సూచీ సెన్సెక్స్ 58.80 పాయింట్లు లేదా 0.08 శాతం దిగజారి 74,683.70 వద్ద నిలిచింది. అయితే అంతకుముందు ఒకానొక దశలో 381.78 పాయింట్లు పుంజుకొని 75,124.28 స్థాయిని తాకింది. దీంతో నయా ఇంట్రా-డే హై నమోదైంది. నేషనల్ స్టాక్ ఎక్సేంజ్ (ఎన్ఎస్ఈ) సూచీ నిఫ్టీ సైతం 23.55 పాయింట్లు లేదా 0.10 శాతం తగ్గి 22,642.75 వద్ద ముగిసింది. ఇంట్రా-డేలో మాత్రం 102.1 పాయింట్లు పెరిగి 22,768.40కు చేరి ఆల్టైమ్ హై రికార్డును నెలకొల్పింది. కాగా, ఇన్వెస్టర్లు లాభాల స్వీకరణకు మొగ్గు చూపడంతోనే జీవనకాల గరిష్ఠాల్లో ఉన్న సూచీలు పడిపోయాయని నిపుణులు ట్రేడింగ్ సరళిని విశ్లేషిస్తున్నారు. ఇక సెన్సెక్స్లో టైటాన్, రిలయన్స్, ఏషియన్ పెయింట్స్, టెక్ మహీంద్రా, ఇండస్ఇండ్ బ్యాంక్, అల్ట్రాటెక్ సిమెంట్, విప్రో, ఐటీసీ షేర్లు నష్టపోయాయి. బీఎస్ఈ మిడ్క్యాప్ ఇండెక్స్ 0.47 శాతం, స్మాల్క్యాప్ ఇండెక్స్ 0.15 శాతం చొప్పున క్షీణించాయి. రంగాలవారీగా కన్జ్యూమర్ డ్యూరబుల్స్, ఇండస్ట్రియల్స్, క్యాపిటల్ గూడ్స్, టెలీకమ్యూనికేషన్స్ షేర్లు డీలాపడ్డాయి.