Phonepe App Store | దేశీయంగా డిజిటల్ పేమెంట్స్ సేవలందిస్తున్న ఫిన్టెక్ సంస్థ ఫోన్పే (PhonePe).. తన సేవలను విస్తరిస్తోంది. ఇండియన్స్కు యాప్ సేవల కోసం సొంతంగా యాప్ స్టోర్ తెస్తున్నది. ‘మేడ్ ఇన్ ఇండియా’ యాప్ స్టోర్ సిద్ధం చేసింది. త్వరలో ’ఇండస్ యాప్ స్టోర్’ అనే పేరుతో ఇండియన్ యాప్ డెవలపర్లకు అందుబాటులోకి తెస్తున్నది. ఇప్పటివరకు యాప్ స్టోర్స్ నిర్వహిస్తూ ఆధిపత్యం ప్రదర్శిస్తున్న గ్లోబల్ టెక్ దిగ్గజాలు గూగుల్ (Google), ఆపిల్ (Apple) గట్టి సవాల్ విసిరింది. ఈ స్టోర్లో భారత్ యాప్ డెవలపర్లు తమ యాప్స్ను రిజిస్టర్ చేసుకుని అప్ లోడ్ చేసుకునే వెసులుబాటు కల్పిస్తున్నది. భారతీయుల ప్రయోజనార్థం 13 భాషల్లో యాప్ స్టోర్ సేవలు అందుబాటులో ఉంటాయి.
అమెరికా కేంద్రంగా పని చేస్తున్న ఈ-కామర్స్ సంస్థ ‘వాల్మార్ట్’ అనుబంధ సంస్థగా ఉన్న ఫోన్పే ఆధ్వర్యంలోని రూపుదిద్దుకున్న యాప్ స్టోర్ ‘ఇండస్ యాప్’ స్టోర్కు శాంసంగ్ వెంచర్ క్యాపిటల్ ఆర్మ్ మద్దతు అందిస్తోంది. భారతీయ యాప్ డెవలపర్లు ‘ఇండస్ యాప్’ స్టోర్లో రిజిస్టర్ చేసుకోవడంతోపాటు ఫ్రీగా అప్ లోడ్ చేసుకోవచ్చు. ఏడాది తర్వాత స్వల్ప ఫీజు చెల్లించాల్సి ఉంటుంది. యాప్స్ డెవలపర్స్ నుంచి ప్లాట్ ఫామ్ ఫీజు లేదా చార్జీ వసూలు చేయబోవడం లేదని ఫోన్ పే తెలిపింది. యాప్ డెవలపర్లు తమకు నచ్చిన పేమెంట్ గేట్ వే`ను ఫ్రీగా ఇంటిగ్రేట్ చేసుకోవచ్చు.
2015లో ఆకాశ్ డోంగ్రే, సుధీర్ బీ, రాకేశ్ దేశ్ముఖ్ అనే ఐఐటీయన్ల ఆలోచనలతో రూపుదిద్దుకున్నదే ఈ ‘ఇండస్ యాప్’ స్టోర్. భారతీయ స్మార్ట్ ఫోన్ యూజర్లకు చేయూత ఇవ్వడానికి.. వారి చాయిస్కు అనుగుణంగా కంటెంట్ అందించేందుకు ‘ఇండస్ ఓఎస్’ అనే యాప్ కంటెంట్ డిస్కవరీ ప్లాట్ఫామ్ ఏర్పాటు చేశారు.
గూగుల్ ప్లే స్టోర్ గానీ, ఆపిల్ యాప్ స్టోర్ గానీ అన్ని యాప్లను అనుమతించడం లేదు. యాప్లు రూపొందించిన డెవలపర్ల నుంచి ప్రతియేటా 15-25 శాతం ఫీజు వసూలు చేస్తున్నాయి.
‘వచ్చే మూడేండ్లలో భారత్లో వంద కోట్ల మందికిపైగా స్మార్ట్ ఫోన్ యూజర్లు ఉంటారు. ఈ నేపథ్యంలో న్యూ జనరేషన్ అండ్ లోకలైజ్డ్ ఆండ్రాయిడ్ యాప్ స్టోర్ నిర్మాణానికి మంచి అవకాశం ఉంది. భారీ కస్టమర్ల మార్కెట్, యాప్ డెవలపర్లు ఉన్నా.. వారు తయారు చేసే యాప్స్ పంపిణీ చేయాలంటే ఏకైక మార్గం ‘గూగుల్ ప్లే స్టోర్’పైనే ఆధార పడాల్సి వస్తున్నది. ఈ పరిస్థితుల్లో భారతీయుల యాప్ డెవలపర్ల కోసం విశ్వసనీయమైన ఆల్టర్నేటివ్ ప్లాట్ఫామ్ అందించగలమన్న ఆశాభావంతో ఉన్నాం ’ అని ఇండస్ యాప్ స్టోర్ కో-ఫౌండర్, సీపీఓ ఆకాశ్ డోంగ్రే తెలిపారు.