IRCTC Circular Journey | ఇప్పుడు ప్రతి ఒక్కరూ పర్సనల్ మొబిలిటీకి ప్రాధాన్యం ఇస్తున్నారు గానీ.. తక్కువ ఖర్చుతో ఎక్కువ దూరం ప్రయాణించాలంటే రైలు ప్రయాణమే బెటర్ ఆప్షన్. కనుక మొదటి నుంచి మెజారిటీ ప్రజలు రైలు ప్రయాణానికే మొగ్గు చూపుతుంటారు. ఇక రోజువారీ వ్యాపారాలు చేసే వారు.. సమీప పట్టణాలు, నగరాల్లో ప్రభుత్వ, ప్రైవేట్ కార్యాలయాల్లో పనులు చేసే వారు సరేసరి.
వేర్వేరు అవసరాల కోసం ప్రతి రోజూ వందల కిలోమీటర్ల దూరం ప్రయాణించే వారి కోసం ఐఆర్సీటీసీ.. ‘సర్క్యులర్ జర్నీ టికెట్’ పేరిట సరికొత్త సర్వీస్ ప్రారంభించింది. అంటే ఒక టికెట్ కొనుగోలు చేస్తే 56 రోజులు వందల మైళ్ల దూరం ప్రయాణించవచ్చు.
భారతీయ రైల్వే అందిస్తున్న ‘సర్క్యులర్ జర్నీ టికెట్’ ద్వారా తక్కువ ఖర్చుతో ఎక్కువ దూరం ప్రయాణించవచ్చు. రెగ్యులర్ రైలు టికెట్తో పోలిస్తే తక్కువకే సర్క్యులర్ జర్నీ టికెట్ లభిస్తుంది. ప్రయాణికులు తమకు వెసులుబాటు గల క్లాస్ బోగీ ఎంచుకునే ఆప్షన్ కూడా ఉంటుంది.
ఒక ప్రయాణం ప్రారంభించి.. గరిష్టంగా 56 రోజులు ప్రయాణం చేసిన తర్వాత తిరిగి మొదటి రైల్వే స్టేషన్కు చేరుకునే వరకూ ఈ సర్క్యులర్ జర్నీ టికెట్’కు వ్యాలిడిటీ ఉంటుంది. మొత్తం 56 రోజుల ప్రయాణంలో ఎనిమిది బ్రేక్లు తీసుకోవచ్చు. మధ్యలో సెలెక్టెడ్ రైల్వేస్టేషన్లలో దిగి.. ఆ ప్రదేశంలో సందర్శించి తిరిగి ప్రయాణం కొనసాగించవచ్చు. ఉద్యోగ, వ్యాపార పనులపై పలు ప్రాంతాల్లో తిరిగే వారికి, ఒకేసారి ఎక్కువ విహార / తీర్థయాత్రలకు వెళ్లే వారికి ‘సర్క్యులర్ జర్నీ టికెట్’ బెటర్ ఆప్షన్
సర్క్యులర్ జర్నీ టికెట్ బుక్ చేసుకోవాలనుకునే వారు రైల్వే డివిజనల్ మేనేజర్ను సంప్రదించాలి. ప్రయాణం ప్లాన్, బ్రేక్స్ను బట్టి టికెట్ ధర ఖరారు చేస్తారు. ప్రయాణం ప్రారంభించే స్టేషన్లో ఈ టికెట్ కొనుక్కోవాలి. సీనియర్ సిటిజన్లకు రాయితీ ఇస్తారు. విడివిడిగా బుక్ చేసుకునే టికెట్ల ధర కంటే సర్క్యులర్ జర్నీ టికెట్ చౌక ధరకే లభిస్తుంది.