Hyundai Creta Facelift | దక్షిణ కొరియా కార్ల తయారీ సంస్థ హ్యుండాయ్ మోటార్ ఇండియా కార్లలో భారత్ మార్కెట్లో అమ్ముడవుతున్న బెస్ట్ సెల్లింగ్ మోడల్ క్రెటా నిలిచింది. ఎస్యూవీ సెగ్మెంట్లో ఇతర సంస్థల నుంచి వస్తున్న పోటీకి 2020 ప్రారంభంలో క్రెటా ఆవిష్కరణతో హ్యుండాయ్ మోటార్స్ సమాధానం చెప్పింది. నాటి నుంచి దేశీయంగా ఎస్యూవీ సెగ్మెంట్ కార్ల విక్రయాల్లో తన స్థానాన్ని మరింత మెరుగు పర్చుకుంటున్నది. తాజాగా వచ్చే ఏడాది జనవరి 16న క్రెటా ఫేస్లిఫ్ట్ మోడల్ కారును మార్కెట్లో ఆవిష్కరించనున్నది.
హ్యుండాయ్ క్రెటా ఫేస్లిఫ్ట్ స్ప్లిట్ వర్టికల్ ఎల్ఈడీ హెడ్ ల్యాంప్స్, హెచ్-షేప్డ్ ఎల్ఈడీ డీఆర్ఎల్స్, న్యూ గ్రిల్లె డిజైన్ ఉంటుందని తెలుస్తున్నది. న్యూ టెయిల్ గేట్తోపాటు రివైజ్డ్ టెయిల్ ల్యాంప్స్ ఉంటాయని సమాచారం. కియా సెల్టోస్ మాదిరిగా ఇంటీరియర్గా 360-డిగ్రీ కెమెరా, అడాస్ సూట్ వ్యవస్థలు ఉంటాయి.
హ్యుండాయ్ క్రెటా ఫేస్లిఫ్ట్ కారు ఇంజిన్ 1.5-లీటర్ల నేచురల్లీ ఆస్పిరేటెడ్ టర్బో పెట్రోల్ ఇంజిన్తో వస్తోంది. ఈ ఇంజిన్ 160 హెచ్పీ విద్యుత్ వెలువరించడంతోపాటు మాన్యువల్ ట్రాన్స్ మిషన్, 7-స్పీడ్ డ్యుయల్ క్లచ్ ఆటోమేటిక్ ట్రాన్స్ మిషన్ ఆప్షన్ కలిగి ఉంటుంది. 1.5 లీటర్ల నేచురల్లీ ఆస్పిరేటెడ్ పెట్రోల్ ఇంజిన్, 1.5 లీటర్ల డీజిల్ ఇంజిన్ ఆప్షన్లతో కూడి వస్తుంది.
ప్రస్తుత మోడల్ క్రెటాతో పోలిస్తే క్రెటా ఫేస్ లిఫ్ట్ ధర ఎక్కువగా ఉంటుందని భావిస్తున్నారు. మారుతి సుజుకి గ్రాండ్ విటారా, కియా సెల్టోస్, ఎంజీ హెక్టార్, స్కోడా కుషాక్, ఫోక్స్ వ్యాగన్ టైగూన్, సిట్రోన్ సీ ఎయిర్ క్రాస్, హోండా ఎలివేట్ మోడల్ కార్లతో పోటీ పడనున్నది.