HMD Crest – Crest Max 5G | ప్రముఖ ఫిన్లాండ్ స్మార్ట్ ఫోన్ల తయారీ సంస్థ హెచ్ఎండీ (HMD) తన హెచ్ఎండీ క్రెస్ట్ (HMD Crest), హెచ్ఎండీ క్రెస్ట్ మ్యాక్స్ 5జీ (HMD Crest Max 5G) స్మార్ట్ ఫోన్లను భారత్ మార్కెట్లో గురువారం ఆవిష్కరించింది. నూతన స్మార్ట్ ఫోన్లు మూడు కలర్ ఆప్షన్లతో 6.67 అంగుళాల ఓలెడ్ డిస్ ప్లే, యూనిసోక్ టీ760 5జీ ప్రాసెసర్లతోపాటు 50-మెగా పిక్సెల్ ఫ్రంట్ కెమెరాలతో వస్తున్నాయి. హెచ్ఎండీ క్రెస్ట్ డ్యుయల్ రేర్ కెమెరా, హెచ్ఎండీ క్రెస్ట్ మ్యాక్స్ 5జీ ఫోన్ ట్రిపుల్ రేర్ కెమెరా సెటప్ లతో వస్తున్నాయి. రెండు ఫోన్లలోనూ 5000 ఎంఏహెచ్ కెపాసిటీ గల బ్యాటరీ, ఈజీ సెల్ఫ్ రిపేర్ ఫీచర్లు ఉంటాయి.
హెచ్ఎండీ క్రెస్ట్ ఫోన్ రూ.12,999, హెచ్ఎండీ క్రెస్ట్ మ్యాక్స్ రూ.14,999లకు లభిస్తాయి. ఈ ధరలు ఇంట్రడ్యూసరీ ఆఫర్ అని మాత్రమే హెచ్ఎండీ తెలిపింది. హెచ్ఎండీ క్రెస్ట్ ఫోన్ మిడ్ నైట్ బ్లూ, లుష్ లిలాక్, రాయల్ పింక్ కలర్ ఆప్షన్లలోనూ, హెచ్ఎండీ క్రెస్ట్ మ్యాక్స్ ఆక్వా గ్రీన్, డీప్ పర్పుల్, రాయల్ పింక్ కలర్ ఆప్షన్లలో లభిస్తాయి. ఆగస్టులో ప్రారంభమయ్యే అమెజాన్ గ్రేట్ ఫ్రీడమ్ సేల్ ఆఫర్ సందర్భంగా అమెజాన్ ద్వారా ఈ రెండు ఫోన్ల సేల్స్ ప్రారంభం అవుతాయి.
హెచ్ఎండీ క్రెస్ట్, హెచ్ఎండీ క్రెస్ట్ మ్యాక్స్ ఫోన్లు ఆండ్రాయిడ్ 14 వర్షన్ పై పని చేస్తాయి. రెండు ఫోన్లూ 6.67 అంగుళాల ఫుల్ హెచ్డీ+ ఓలెడ్ డిస్ ప్లేతో వస్తున్నాయి. ఓక్టాకోర్ 6ఎన్ఎం యూనిసోక్ టీ760 ప్రాసెసర్ తో అందుబాటులో ఉంటాయి. హెచ్ఎండీ క్రెస్ట్ ఫోన్ 6జీబీ ర్యామ్ విత్ 128 జీబీ స్టోరేజీ, హెచ్ఎండీ క్రెస్ట్ మ్యాక్స్ ఫోన్ 8జీబీ ర్యామ్ విత్ 256 జీబీ స్టోరేజీ వేరియంట్లలో లభిస్తాయి.
హెచ్ఎండీ క్రెస్ట్ ఫోన్ ఏఐ బ్యాక్డ్ 50-మెగా పిక్సెల్ డ్యుయల్ కెమెరా సెటప్, హెచ్ఎండీ క్రెస్ట్ మ్యాక్స్ 5జీ ఫోన్ 64-మెగా పిక్సెల్ ప్రైమరీ సెన్సర్ కెమెరా, 5-మెగా పిక్సెల్ ఆల్ట్రా వైడ్ కెమెరా, 2-మెగా పిక్సెల్ మాక్రో కెమెరా సెన్సర్ కెమెరాలు కలిగి ఉంటాయి. రెండు ఫోన్లలోనూ సెల్ఫీలూ వీడియో కాల్స్ కోసం 50-మెగా పిక్సెల్ సెన్సర్ కెమెరా ఉంటుంది. 33వాట్ల చార్జింగ్ మద్దతుతో 5000 ఎంఏహెచ్ కెపాసిటీ గల బ్యాటరీతో వస్తాయి.