GST Council | కొత్తగా 11 రాష్ట్రాల నుంచి ఆర్థిక మంత్రులు చేరడంతో మూడు మంత్రుల బృందాలను జీఎస్టీ కౌన్సిల్ పునర్వ్యవస్థీకరించనున్నది. జీఎస్టీపై రెవెన్యూ, జీఎస్టీ కింద రియల్ ఎస్టేట్ రంగం పురోభివృద్ధి, జీఎస్టీ వ్యవస్థలో సంస్కరణలు అనే అంశాలపై మూడు మంత్రుల బృందాలను జీఎస్టీ కౌన్సిల్ నియమించనున్నది. శనివారం జీఎస్టీ కౌన్సిల్ 53వ సమావేశం జరిగిన సంగతి తెలిసిందే. ఈ సమావేశానికి ఆంధ్రప్రదేశ్, బీహార్, ఛత్తీస్ గఢ్, హరయానా, మధ్యప్రదేశ్, మిజోరం, ఒడిశా, రాజస్థాన్, సిక్కిం, తెలంగాణ, త్రిపుర రాష్ట్రాల నుంచి కొత్త ఆర్థిక మంత్రులు హాజరయ్యారు. గతేడాది అక్టోబర్ ఏడో తేదీన జీఎస్టీ కౌన్సిల్ 52వ సమావేశం జరిగింది.
జీఎస్టీ రేట్ల హేతుబద్దీకరణపై గత ఫిబ్రవరిలో మంత్రుల బృందం (జీఓఎం)ను పునర్వ్యవస్థీరించారు. దీనికి బీహార్ డిప్యూటీ సీఎం సామ్రాట్ చౌదరి కన్వీనర్గా నియమితులయ్యారు. మరో మూడు జీఓఎంల పునర్వ్యవస్థీకరణపై జీఎస్టీ కౌన్సిల్ ఇంకా నోటిఫికేషన్ ఇవ్వలేదు.
జీఎస్టీ ద్వారా రెవెన్యూపై విశ్లేషణకు ఏర్పాటైన జీఓఎంలో ఒడిశా ఆర్థిక మంత్రిని చేరుస్తారు. ఇటీవలి అసెంబ్లీ ఎన్నికల్లో ఒడిశాలో బీజేపీ అధికారంలోకి వచ్చింది. అలాగే హర్యానా నుంచి కొత్త ఆర్థిక మంత్రి పేరు ఈ జీఓఎంలో చేరుస్తారు. రియల్ ఎస్టేట్ రంగంపై జీఎస్టీ జీఓఎంకు మహారాష్ట్ర డిప్యూటీ సీఎం అజిత్ పవార్ సారధ్యం వహిస్తున్నారు. బీహార్ ఆర్థిక మంత్రి మారిన నేపథ్యంలో పునర్వ్యవస్థీకరిస్తారు. అజిత్ పవార్ సారధ్యంలోనే జీఎస్టీ వ్యవస్థలో సంస్కరణలపై ఏర్పాటైన జీఓఎంలో అసోం, ఆంధ్రప్రదేశ్, ఛత్తీస్ గఢ్, ఒడిశా రాష్ట్రాల ఆర్థిక మంత్రులకు చోటు కల్పిస్తారు.