Gold Rates | దేశీయంగా కొనుగోళ్ల మద్దతు లభించడంతో బులియన్ మార్కెట్లో బంగారం ధర ధగధగ మెరుస్తున్నది. గురువారం దేశ రాజధాని ఢిల్లీలో పది గ్రాముల బంగారం (24 క్యారట్స్) ధర రూ.700 వృద్ధి చెంది రూ.76,400లకు దూసుకెళ్లింది. ఫారెక్స్ మార్కెట్లో అమెరికా డాలర్ పై రూపాయి మారకం విలువ తగ్గడం కూడా బంగారం ధర పెరుగడానికి కారణం. ఆల్ ఇండియా సరఫా అసోసియేషన్ వద్ద అందుబాటులో ఉన్న ధరల ప్రకారం బుధవారం తులం బంగారం ధర (24 క్యారట్స్) రూ.75,700లతో ముగిసింది.
వరుసగా ఆరు సెషన్లలో బంగారం ధర పెరగడంతో దేశ రాజధానిలో గురువారం తులం ధర రూ.76,400లకు చేరుకున్నది. మరోవైపు కిలో వెండి ధర రూ.400 తగ్గి, రూ.94 వేలకు పడిపోయింది. బుధవారం కిలో వెండి ధర రూ.94,400 వద్ద స్థిర పడింది. గురువారం అమెరికా డాలర్పై రూపాయి మారకం విలువ ఆరు పైసలు పతనమై జీవిత కాల కనిష్టం రూ.83.64లకు పతనమైంది.అంతర్జాతీయంగా కామెక్స్ గోల్డ్ లో ఔన్స్ బంగారం ధర 6.90 డాలర్లు వృద్ధి చెంది 2466.80 డాలర్లు పలికింది. వచ్చే సెప్టెంబర్ నెలలో వడ్డీరేట్లు తగ్గిస్తామని యూఎస్ ఫెడ్ రిజర్వు ప్రకటించడంతో బంగారం ధరలకు రెక్కలొచ్చాయని విశ్లేషకులు చెబుతున్నారు.